მცირე მეწარმეებისთვის ახალი, შეღავათიანი საგადასახადო რეჟიმი ამოქმედდება, – ამის შესახებ საქართველოს პრემიერ-მინისტრმა გიორგი კვირიკაშვილმა მთავრობის სხდომაზე განაცხადა.
“მოგეხსენებათ, რომ მეწარმეობის განვითარება ჩვენთვის არის მნიშვნელოვანი პრიორიტეტი, განსაკუთრებით მცირე მეწარმეობის. მე პარლამენტში მთავრობის დამტკიცების დრო ვისაუბრე, რომ ვიწყებთ მცირე ბიზნესის დახმარების მეორე ტალღას მას შემდეგ, რაც წარმატებით ხორციელდება პროგრამები „აწარმოე საქართველოში“, სოფლის მეურნეობის მიმართულებით პროგრამები – „დანერგე მომავალი“, და ა.შ. ჩვენ შემოვდივართ ახალი ინიციატივით და მადლობა მამუკა ბახტაძეს, რომელმაც საინტერესო საკანონმდებლო პაკეტის ინიცირება წარმოადგინა მთავრობის სხდომაზე. ეს გახლავთ ინიციატივა მცირე მეწარმეებისთვის დაბეგვრის შეღავათაინი რეჟიმის დაწესების თაობაზე. მცირე მეწარმეებისთვის ხუთჯერ ვამცირებთ ბრუნვის გადასახადს, ანუ 5%-იანი ბრუნვის გადასახდი იქნება 1%-აინი. ამასთან, მცირე მეწარმედ დღეს თუ ითვლება 100 ათას ლარამდე ბრუნვის მქონე საწარმო, 500 ათას ლარამდე ბრუნვის საწარმო ჩაითვლება ამ კატეგორიაში. ეს არის მნიშვნელოვანი შვება მცირე მეწარემეობით დაკავებული ადამიანებისთვის, ძალიან მნიშვნელოვანი შემცირება საგადასახადო ტვირთის და წახალისება ახალი მეწარმეების, რომლებსაც სურთ საქმიანობის წამოწყება”, – განაცხადა გიორგი კვირიკაშვილმა.