“2017 წელი საგარეო ურთიერთობების მიმართულებით დატვირთული, შედეგზე ორიენტირებული და წარმატებული იყო”

პარლამენტის საგარეო ურთიერთობათა, დიასპორისა და კავკასიის საკითხთა და ევროპასთან ინტეგრაციისა კომიტეტების გაერთიანებული სხდომაზე საგარეო საქმეთა მინისტრს უსმენენ.
აღნიშნული კომიტეტის თავმჯდომარის სოფიო ქაცარავას განცხადებით, იმისთვის, რომ ყველა აქტუალური საკითხი ინტერაქტიულ ფორმატში იყოს განხილული, კომიტეტში მინისტრების ანგარიშის მოსმენას რეგულარული ხასიათი უნდა მიეცეს. მისი თქმით, აღნიშნული ხელს უწყობს ქვეყანაში საპარლამენტო როლის გაძლიერებას.
„2017 წელი საგარეო ურთიერთობების მიმართულებით დატვირთული, შედეგზე ორიენტირებული და წარმატებული იყო, თუმცა გასათვალისწინებელია, რომ არსებობს გარკვეული გამოწვევებიც. გასული წლის შეჯამებასთან ერთად, მნიშვნელოვანია, რომ უფრო მეტი ყურადღება გავამახვილოთ სამომავლო ხედვებზე და ისეთ პრიორიტეტულ მიმართულებებზე, როგორიცაა საქართველოს ოკუპირებული ტერიტორიები და არაღიარების პოლიტიკა; საქართველო ევროკავშირის ურთიერთობები, მათ შორის ვიზის ლიბერალიზაცია, რაც დღეს ძალიან აქტუალურ საკითხად იქცა. საინტერესოა ასევე თქვენს მიერ დაანონსებული მნიშვნელოვანი ინიციატივა – საგზაო რუკა. ასევე, თანამშრომლობა ნატოსთან და ამ კონტექსტში განსაკუთრებით ზაფხულის სამიტთან დაკავშირებული მოლოდინები; ამერიკის შეერთებულ შტატებთან სტრატეგიული ურთიერთობები, რაც ასევე გამორჩეულად წარმატებულია ახალი ადმინისტრაციის პირობებში და თუ გვაქვს რომელიმე კონკრეტული მიმართულებით თანამშრომლობის კიდევ უფრო გააქტიურების მოლოდინი. ასევე, მნიშვნელოვანია აზიის ქვეყნებთან დაკავშირებული სავაჭრო-ეკონომიკური თანამშრომლობის სამომავლო ხედვები“, – განაცხადა სოფიო ქაცარავამ სხდომის გახსნისას.