პარლამენტის დიასპორის საკითხთა კომიტეტის სხდომაზე ერთმანეთს ოპოზიციონერი დეპუტატი თინა ბოკუჩავა და კომიტეტის თავმჯდომარე ზვიად კვაჭანტირაძე დაუპირისპირდნენ.
გამოსვლისას თინა ბოკუჩავამ ყოფილი პრეზიდენტის ექსტარდირების საკითხზე ისაუბრა და დაინტერესდა, ქართულმა მხარემ მიმართა თუ არა პოლონეთის, გერმანიისა და ჰოლანდიის მთავრობებს მიხეილ სააკაშვილის ექსტრადირების მოთხოვნით.
„თუ არ მიგიმართავთ, საქმე რაშია? თუ არ მიმართეთ, მაშინ თქვენი შინაგან საქმეთა მინისტრის განცხადება გამახსენდა, რომ ივანიშვილს სააკაშვილის საქართველოში ჩამოსვლის ეშინია და მის გადმოცემას ვერ ითხოვთ”, – მიმართა წულუკიანს ბოკუჩავამ.
ამასთან, ბოკუჩავამ აღნიშნა, რომ მივლინებებთან და ხარჯებთან დაკავშირებით იუსტიციის სამინისტროს სადეპუტატო კითხვით მიმართა, თუმცა პასუხი ამ დრომდე არ მიუღია, რაც იმას აჩვენებს, რომ საპარლამენტო კონტროლი არ არსებობს.
ბოკუჩავას კვაჭანტირაძე გამოეხმაურა და მოუწოდა, კითხვები განსახილველ საკითხზე – მოქალაქეობაზე დასვას.
„თქვენ დემოკრატიაზე ნუ მოგვიწოდებთ. თქვენ იყავით, ვის დროსაც დემოკრატია ფეხქვეშ ითელებოდა. საშუალებას არ მოგცემთ, რომ სპექტაკლი დადგათ”, – მიმართა კვაჭანტირაძემ ბოკუჩავას.