პარლამენტის ფრაქცია „პატრიოტების“ წევრი, ტელეკომპანია “იბერიის” ერთ-ერთი დამფუძნებელი ნატო ჩხეიძე ტელეკომპანიის ირგვლივ განვითარებულ პროცესებს ეხმაურება. ნატო ჩხეიძე პრემიერ-მინისტრის განცხადებასაც გამოეხმაურა და აღნიშნა, რომ მედიის საშუალებით შანტაჟის რაიმე მცდელობა აბსოლუტურად გამორიცხულია.
„ომეგა“ ჯგუფში ბევრი კომპანია შედის. „ომეგა“ ოც წელზე მეტია წარმატებული კომპანიაა და მის მიერ უამრავი ადამიანია დასაქმებული. „ომეგა“ ჯგუფში შემავალი ერთ-ერთი სექტორი ფაბრიკაა, რომელიც ახლა გარკვეული მიზეზების გამო დაზარალებულია. ეს მიზეზები არალეგალური მოქმედებებია, საქმის კურსში არიან პარლამენტის დარგობრივი ეკონომიკის კომიტეტი, მთავრობა და სასამართლოც. საკითხის შესახებ დავა სასამართლოში მიმდინარეობს. ალბათ, ყველანაირი არალეგალური მოქმედებები აღიკვეთება, რადგან ყველა ამისთვის არის მოწოდებული.
„ომეგას“ მიმართ შეტევას ვერ დავარქმევ იმას, რაც ახლა ხდება. ტელეკომპანიზე შეტევა 2004 წელს განხორციელდა და დღევანდელი ვითარება 2004 წლის ამბებისგან ძალიან განსხვავებულია. ის იყო შეტევა და ახლა შეტევას ვერ დავარქმევ იმას, რაც ხდება. ძალიან განსხვავებული ვითარებაა.
შანტაჟი ყველას მხრიდან დაუშვებელია. „იბერია“ და სხვა ტელეკომპანიები დამოუკიდებლები არიან და ისინი არანაირად არ არიან პოლიტიკური თუ ეკონომიკური ზემოქმედებისთვის გამოყენებული. მედიის საშუალებით შანტაჟის რაიმე მცდელობა აბსოლუტურად გამორიცხულია, მედიას თავისი საქმე აქვს, მთავრობას თავისი და პარლამენტს – თავისი. თუ ყველა თავის საქმეს კარგად გააკეთებს, ეს მხოლოდ ჩვენს მომავალს წაადგება“, – განაცხადა ჩხეიძემ.