არჩილ ტატანაშვილის გარდაცვალების საკითხზე ხვალ, სავარაუდოდ, ევროკავშირის საგარეო ურთიერთობათა საბჭოში იმსჯელებენ. ამის შესახებ ლიტვის საგარეო საქმეთა მინისტრი ლინას ლინკევიჩიუსი სოციალურ ქსელ „ტვიტერში“ წერს.
„რეპრესიული რეჟიმის მახინჯი სახე რუსეთის მიერ ოკუპირებულ სამხრეთ ოსეთში. ვგმობ საქართველოს მოქალაქეთა დევნას, ვითხოვ ადგილზე შეიქმნას საერთაშორისო ადამიანის უფლებათა დაცვისა და უსაფრთხოების მექანიზმი. ამ საკითხს ხვალ, ევროკავშირის საგარეო ურთიერთობათა საბჭო სხდომაზე დავაყენებ”, – აცხადებს ლინკევიჩიუსი და საქართველოს საგარეო საქმეთა სამინისტროს განცხადებას ავრცელებს.
22 თებერვალს ოკუპირებული ცხინვალის წარმომადგენლებმა საქართველოს მოქალაქეები არჩილ ტატუნაშვილი, ლევან ქუტაშვილი და იოსებ პავლიაშვილი უკანონოდ დააკავეს. არჩილ ტატუნაშვილი 23 თებერვალს ოკუპირებულ ქალაქ ცხინვალის საავადმყოფოში გარდაიცვალა.