ჩვენი ხელისუფლება ყოველწუთიერად, აქტიურად მუშაობს ოკუპირებულ ტერიტორიაზე მყოფ ოფიციალურ თუ არაოფიციალურ, დე ფაქტო, თუ ოკუპირებულ ტერიტორიებზე მოქმედ ამ საქმეში ჩართულ პირებთან, რათა რაც შეიძლება მალე გადმოასვენონ ცხედარი, – ამის შესახებ საქართველოს იუსტიციის მინისტრმა არჩილ ტატუნაშვილის გადმოსვენებაზე დასმული კითხვის საპასუხოდ განაცხადა.
“მინდა, მივუსამძიმრო არჩილ ტატუნაშვილის დედას, მშობლებს, ოჯახის წევრებს, ახლობლებს. ეს ტრაგედია არ არის მხოლოდ მათი ტრაგედია, ეს ჩვენი ყველას ტრაგედიაა, როდესაც რუსეთის ოკუპაციის პირობებში დე ფაქტო ხელისუფლებასთან ერთად ამგვარი ტრაგიკული ამბების მომსწრენი ვხდებით. მინდა, როგორც ჩემმა კოლეგებმა უკვე არაერთხელ თქვეს, კიდევ ერთხელ დავადასტურო, რომ პრემიერ-მინისტრის ხელმძღვანელობით ჩვენი ხელისუფლება ყოველწუთიერად აქტიურად მუშაობს ოკუპირებულ ტერიტორიაზე მყოფ ოფიციალურ თუ არაოფიციალურ, დე ფაქტო, თუ ოკუპირებულ ტერიტორიებზე მოქმედ ამ საქმეში ჩართულ პირებთან, რათა რაც შეიძლება მალე გადმოასვენონ ცხედარი, იმისთვის, რომ შევძლოთ მას მივაგოთ პატივი. ეს არის ძალიან მნიშვნელოვანი თითოეული ჩვენგანისთვის და რაც მთავარია ოჯახისთვის”, – განაცხადა თეა წულუკიანმა.