ყველა ე.წ. ბრალდება, რომელიც არჩილ ტატუნაშვილის მიმართ ვრცელდება, სიმართლეს არ შეესაბამება და თითიდან გამოწოვილი მიზეზებია, – ამის შესახებ შერიგებისა და სამოქალაქო თანასწორობის საკითხებში სახელმწიფო მინისტრმა ქეთევან ციხელაშვილმა განაცხადა.
ციხელაშვილი გამოეხმაურა ოკუპირებული სამხრეთ ოსეთის დე ფაქტო საგარეო საქმეთა სამინისტროს განცხადებას, რომელშიც აღნიშნულია, რომ ”ტატუნაშვილი 2008 წლის აგვისტოს ომში მშვიდობიან მოსახლეობას ხოცავდა”.
“ჩვენ არაერთხელ გავაკეთეთ განცხადება, რომ ყველა ის ე.წ. ბრალდება, რომელიც ამ პირის მიმართ იყო, სიმართლეს არ შეესაბამება, თითიდან გამოწოვილი იყო. მე ვფიქრობ, ამ განცხადებაში სხვა პასაჟებიც იყო. მინდა ხაზგასმით ვთქვა, რომ თუ გარკვეულ ძალებს აქვთ ინტერესი, ხელი შეეშალოს შერიგების და საშვიდობო პოლიტიკას, ეს ვერ და არ მოხდება. ეს არ ნიშნავს იმას, რომ ჩვენ ვგეგმავთ შერიგებას რაიმე ტიპის ადამიანის უფლებების დარღვევებზე, მით უმეტეს, ადამიანის სიცოცხლის ხელყოფაზე“, – განაცხადა ქეთევან ციხელაშვილმა.
შეგახსენებთ, დღეს ოკუპირებული სამხრეთ ოსეთის დე ფაქტო საგარეო საქმეთა სამინისტროში განაცხადეს, რომ არჩილ ტატუნაშვილის გარდაცვალება მათ ინტერესებში არანაირად არ შედიოდა.
„ბოლო დროს საქართველოში აქტიურად იძაბება სიტუაცია ცხინვალის რესპუბლიკურ საავადმყოფოში საქართველოს მოქალაქე არჩილ ტატუნაშვილის გარდაცვალებასთან დაკავშირებით.
სადაზვერვო-დივერსიულ საქმიანობასა და 2008 წლის აგვისტოში მშვიდობიანი მოსახლეობის მკვლელობაში ეჭვმიტანილი ტატუნაშვილი სამხრეთ ოსეთის სამართალდამცველებმა 2018 წლის 22 თებერვალს, ლენინგორში დააკავეს.
ყურადღებას იქცევს ერთი მნიშნელოვანი გარემოება – საგამოძიებო იზოლატორში, ბადრაგირების დროს ტატუნაშვილი თავს დაესხა ბადრაგს, წაართვა ერთ-ერთ მათგანს ტაბელური იარაღი და ცეცხლის გახსნა სცადა. სამართალდამცველებმა ეს მცდელობა აღკვეთეს, გამოიყენეს ძალა და თავდასხმელი გააუვნებელყვეს. საღი აზრი გვკარნახობს, რომ არჩილ ტატუნაშვილის გარდაცვალება სამხრეთ ოსეთის ინტერესებში არანაირად არ შედიოდა, ვინაიდან საქმეზე არსებითი წარმოების დაწყებამდე ეჭვმიტანილის გაქცევის მცდელობა საფუძვლიანად ფასდება როგორც არსებული ეჭვის დადასტურება“, – განაცხადეს „უწყებაში“.