“საქართველომ არ უნდა დაუშვას, რომ პანკისის ხეობა ისეთივე უმართავი გახდეს, როგორც ეს 20 წლის წინ იყო”

საქართველოში აშშ-ის ყოფილმა ელჩმა კენეტ იალოვიცმა, „ამერიკის ხმის“ ქართულ რედაქციასთან ინტერვიუში, 1999 წელს, რუსეთის მიერ პანკისის ხეობაში შემოჭრის მზაობაზე ისაუბრა. მან საქართველოს მოუწოდა, ფრთხილად დააკვირდეს იმ ადამიანებს, რომლებიც ახლო აღმოსავლეთიდან ბრუნდებიან უკან. ყოფილმა ელჩმა პანკისის ხეობაში არსებულ ვითარებაზეც გაამახვილა ყურადღება და აღნიშნა, რომ ქვეყანამ არ უნდა დაუშვას, ხეობა ისეთივე უმართავი გახდეს, როგორც 20 წლის წინ იყო.
აღსანიშნავია, რომ იალოვიცი, ამერიკის ელჩი საქართველოში, ედუარდ შევარდნაძის პრეზიდენტობის პერიოდში იყო.
„შევარდნაძის მთავრობას აქტიურად მოვუწოდებდით, პანკისზე კონტროლი დაემყარებინა, – სიტუაციას ამის გარდა, სხვა ვერაფერი შეცვლიდა. დღეს ისმის შეშფოთება ტერორიზმთან დაკავშირებით. დღეს საქართველოს მოვუწოდებ, ფრთხილად დააკვირდეს იმ ადამიანებს, რომლებიც ახლო აღმოსავლეთიდან ბრუნდებიან უკან. ისინი შეიძლება ჩეჩნები და შეიძლება ქართველები იყვნენ. საქართველომ ყველანაირად უნდა სცადოს ამ ადამიანების ქვეყანაში დაბრუნების აღკვეთა. რუსეთს იგივე პრობლემა აქვს ჩრდილოეთ კავკასიასთან დაკავშირებით და ამ სფეროში, ვფიქრობ საქართველოს და რუსეთის ინტერესები იკვეთება. არ ვიცი ეს რამდენადაა შესაძლებელი, მაგრამ ეს აზრი მომსვლია. საქართველომ არ უნდა დაუშვას, რომ პანკისის ხეობა ისეთივე უმართავი გახდეს, როგორც ეს 20 წლის წინ იყო. ამ სახის კონტროლის დაწესება კი, პოლიციის ძალის გამოყენებითაა შესაძლებელი. მე არ ვიცი რამდენად აქტიურადაა პოლიცია მოსახლეობასთან ჩართული პანკისის ხეობაში დღეს. მაგრამ ვიცი, რომ საკმარისი რაოდენობის პოლიციის ოფიცრების ყოლა მოქალაქეების უსაფრთხოების გარანტი იქნება და „ცუდი ადამიანების“ რეგიონში დაბრუნებას ხელს შეუშლის. პოლიციასთან ერთად, ცხადია, აქტიურად უნდა მუშაობდეს სადაზვერვო სამსახურებიც“, – განაცხადა კენეტ იალოვიცმა.