ოკუპირებული ცხინვალის დე ფაქტო ხელისუფლების მიერ არჩილ ტატუნაშვილთან ერთად დაკავებულ ლევან ქუტაშვილსა და იოსებ პავლიაშვილს წამების კვალი არ აღენიშნებათ, – ამის შესახებ შინაგან საქმეთა მინისტრის მოადგილემ კახაბერ საბანაძემ პირველი არხის გადაცემაში „ახალი კვირა“ პირდაპირი ჩართვისას განაცხადა.
მისი თქმით, შსს-მა, სახელმწიფო უსაფრთხოების სამსახურთან და სხვა სახელმწიფო ინსტიტუტებთან ერთად, მაქსიმალური გააკეთა იმისთვის, რომ ამ ახალგაზრდების დროულად გათავისუფლება მომხდარიყო.
„გათავისუფლებული არიან ლევან ქუტაშვილი და იოსებ პავლიაშვილი, საქართველოს მოქალაქეები და ისინი უკვე არიან საქართველოს ცენტრალური ხელისუფლების მიერ კონტროლირებად ტერიტორიაზე. შსს-მა, სახელმწიფო უსაფრთხოების სამსახურთან და სხვა სახელმწიფო ინსტიტუტებთან ერთად მაქსიმალური გააკეთა იმისთვის, რომ მომხდარიყო ამ ახალგაზრდების დროულად გათავისუფლება.
როგორც მოგეხსენებათ, ისინი 22 თებერვალს ოკუპირებულ ტერიტორიაზე დე ფაქტო ხელისუფლების წარმომადგენლებმა დააკავეს და დღეს უკვე მოხდა ჩვენ მიერ კონტროლირებად ტერიტორიაზე გადმოყვანა“, – განაცხადა საბანაძემ.