ჩვენი ქვეყნის თითოეული მოქალაქისთვის გასახარი ამბავია ის, რომ ნატო-ს გენერალური მდივანი აფიქსირებს მხარდაჭერას ჩვენი ქვეყნის მიმართ, – ამის შესახებ საქართველოს პარლამენტის ფრაქცია „ქართული ოცნების“ თავმჯდომარემ მამუკა მდინარაძემ ჟურნალისტებს ნატო-ს გენერალური მდივნის განცხადების შეფასებისას განუცხადა.
მდინარაძის თქმით, საქართველოს მომავალი არის ევროპა და ამ გზას არასდროს უნდა გადავუხვიოთ.
„ძალიან რთულია კონკრეტულ თარიღებზე და მოლოდინებზე მსგავს საკითხებთან დაკავშირებით საუბარი. თუმცა, ნამდვილად მისასალმებელია და ჩვენი ქვეყნის თითოეული მოქალაქისთვის გასახარი ამბავი ის, რომ ნატო-ს გენერალური მდივანი აფიქსირებს მხარდაჭერას ჩვენი ქვეყნის მიმართ, აფიქსირებს მხარდაჭერას რეფორმების მიმართ და შესაბამისად, პერსპექტივებს გაცილებით რეალურად განიხილავს.
საქართველოსთვის ეს მხარდაჭერა ნიშნავს იმას, რომ რაც უფრო ახლოა ევროატლანტიკურ სტრუქტურებთან საქართველო, მით მეტია პერსპექტივა ევროპულ ოჯახში, გაერთიანებაში დაბრუნების, უფრო მეტია იმის პერსპექტივა, რომ ჩვენი ქვეყნის თითოეული მოქალაქის მდგომარეობა იქნება გაცილებით უკეთესი ხვალ. ეს არის ევროპა, ეს არის ჩვენი მომავალი და გზა, რომელსაც არ უნდა გადავუხვიოთ არასოდეს“, – განაცხადა მამუკა მდინარაძემ.