ერთობლივი პარტნიორობით შეიქმნა მშვენიერი სასტუმრო კომპლექსი დედამიწის ულამაზეს ადგილას, – ამის შესახებ საქართველოს პრემიერ-მინისტრმა გიორგი კვირიკაშვილმა კახეთში, კერძოდ, გურჯაანში ახალი სასტუმრო კომპლექსის გახსნისას განაცხადა.
გიორგი კვირიკაშვილმა სასტუმროს ინვესტიციასა და მის მნიშვნელობაზე ისაუბრა.
„დღეს ძალიან სასიხარულო დღეა. ჩვენს ქვეყანას და კონკრეტულად კახეთს შეემატა ულამაზესი სასტუმრო, აბსოლუტურად თანამედროვე ინფრასტრუქტურით გაწყობილი – ეს არის „ახაშენი-ღვინის კურორტი“.
ამ სასტუმროში 7 მილიონ 500 ათასი ლარის ინვესტიცია განხორციელდა. ინვესტიცია განხორციელდა ერთობლივად, სახელმწიფოს და კერძო სექტორის მიერ. ეს არის პროგრამა „აწარმოე საქართველოში“ . ეს გახლავთ ევროპასთან თავისუფალი სავაჭრო ხელშეკრულების ფარგლებში არსებული პროგრამა და საქართველოს ბანკის ერთობლივი პარტნიორობით შეიქმნა მშვენიერი სასტუმრო-კომპლექსი დედამიწის ამ ულამაზეს ადგილას. ეს არის ალაზნის ველის და ფაფრის მინდვრების მიკროზონა, ულამაზესი ხედით კავკასიონის მთებზე და მართლაც ღირსშესანიშნავი დასასვენებელი ადგილი საქართველოში.
მნიშვნელოვანია, რომ ამ ინვესტიციის შედეგად შეიქმნა ათეულობით ახალი სამუშაო ადგილი, მაგრამ გვერდითი ეფექტები ამ ინვესტიციის არის გაცილებით უფრო დიდი.
მევენახეობის მიმართულებითაც „კახეთის ტრადიციული მეღვინეობა“ ახორციელებს უზარმაზარ ინვესტიციებს და მე მინდა ზურაბ ჩხაიძეს გადავუხადო ძალიან დიდი მადლობა იმ მამულიშვილური საქმისთვის, რომელსაც ის აკეთებს“, – განაცხადა გიორგი კვირიკაშვილმა.