საპარლამენტო უმრავლესობის ლიდერი არჩილ თალაკვაძე „ევროპული საქართველოს” წევრის გივი თარგამაძის განცხადებას ეხმაურება.
„გივი თარგამაძე რომ ბატონ ზურაბ ალავიძეს ადანაშაულებს რაიმეში, თავად ეს ფაქტი ღიმილის მომგვრელია. მედიით ინტენსიურად ვრცელდება ინფორმაცია, რომ მისი ეს ბრალდებები არის მართული პროცესი და შესაძლოა უკავშირდებოდეს „ბლექ სი გრუპის”, აი, ამ ბიზნესსუბიექტის მხრიდან გარკვეულ ინტერესებს, რომელიც ბატონი ალავიძის უწყებასთან მიმართებაში არსებობს. რა თქმა უნდა, ამას ჟურნალისტები უნდა ჩაუღრმავდნენ და აუცილებელია, რომ ვამხილოთ ყველა ის ადამიანი, ვინც სუბიექტური ინტერესებით პოლიტიკურ სპეკულაციებს ეწევა.
მე შემიძლია, ჩემი მხრივ გითხრათ, რომ ინფრასტრუქტურაში და სივრცითი განვითარების მიმართულებით წარმატებით მიმდინარეობს ის გეგმა, რომელიც ოთხპუნქტიან სამთავრობო გეგმაშია მოცემული და ალავიძის უწყებამ 2017 წელს ასეულობით პროექტი განახორციელა, რომელსაც 30 000-მდე ახალი სამუშაო ადგილის შექმნა მოჰყვა.
რა თქმა უნდა, ძალიან რთულია, სერიოზული კომენტარი გააკეთონ იმ ადამიანის ბრალდებაზე, რომელიც თავად არაერთხელ იყო მხილებული და ჩართული პროცესებში, რომელიც სამოქალაქო საზოგადოებამ და რაც მთავარია, ამომრჩეველმა ნეგატიურად შეაფასა წინა ხელისუფლების დროს”, – აცხადებს თალაკვაძე.
„ევროპული საქართველოს” წევრი გივი თარგამაძე საავტომობილო გზების დეპარტამენტს კორუფციულ საქმიანობაში ადანაშაულებს. როგორც გივი თარგამაძემ განაცხადა, კორუფციული გარიგებები ინფრასტრუქტურისა და რეგიონული განვითარების მინისტრის ხელშია. მისი თქმით, ერთ-ერთი მსხვილი კორუფციული სქემა გზის მშენებლობისა და საფარის დაგებას ეხება.