სოფო კილაძე – დედაქალაქის მერის გადაწყვეტილება არის ცივილური

კახა კალაძის გადაწყვეტილება, რომ „სითი ინსტიტუტს“ მიეცეს შესაძლებლობა, დაასრულოს თავისი ვალდებულება, არის ძალიან გონივრული და მიმართული თბილისელების კეთილდღეობის უზრუნველსაყოფად, – ამის შესახებ პარლამენტის ადამიანის უფლებათა დაცვის კომიტეტის თავმჯდომარემ სოფო კილაძემ განაცხადა.
კილაძის თქმით, ქალაქს სჭირდება გენერალური გეგმა, რომელიც მაქსიმალურად იქნება მიმართული გამოწვევებზე ადეკვატური რეაგირებისაკენ.
„იმ ფონზე, როდესაც წლების განმავლობაში დედაქალაქის განვითარების სტრატეგიული ხედვა არ არსებობდა, თბილისი ქაოტურად განვითარდა, რამაც დღეს უამრავი გამოწვევის წინაშე დააყენა მოსახლეობა. ჩვენ გვჭირდება ისეთი გენერალური გეგმა, რომელიც მაქსიმალურად იქნება მიმართული ამ გამოწვევებზე ადეკვატური რეაგირებისაკენ. ის რეალისტური უნდა იყოს, თბილისის საჭიროებებს ითვალისწინებდეს და იმავდროულად ადამიანის უფლებები არ შელახოს. ამ გამოწვევების დაძლევა „სითი ინსტიტუტის“ მიერ უკვე წარმოდგენილი პროექტის ფარგლებში ვერ მოხდებოდა. შესაბამისად, საჭიროა კორექტირება და იმ გარემოებების გათვალისწინება, რომელიც ბალანსს უზრუნველყოფს. მისასალმებელია, რომ თავად ინსტიტუტი მერის პოზიციას ეთანხმება, რაც, რა თქმა უნდა, კახა კალაძის გადაწყვეტილების მართებულობას ამყარებს. დედაქალაქის მერის გადაწყვეტილება არის ცივილური, თანამშრომლობაზე და ყველა დაინტერესებული მხარის ჩართვაზე ორიენტირებული. პროცესი გამჭვირვალედ და დემოკრატიულად მიმდინარეობს. მასში ჩართულია ყველა დაინტერესებული მხარე, რაც ვფიქრობ, დახვეწილი გენერალური გეგმის საბოლოო შემუშავების ძალიან კარგი საფუძველი იქნება“, – განაცხადა კილაძემ.
სოფო კილაძის კომენტარს საქართველოს პარლამენტის პრესსამსახური ავრცელებს.