საქართველოს ექსპრეზიდენტ მიხეილ სააკაშვილისა და „ევროპული საქართველოს“ წევრის ზურაბ ჭიაბერაშვილის მიერ გაკეთებულ განცხადებებს, იმის თაობაზე, რომ სოციალური მდგომარეობის გაუარესების გამო, საქართველოში მოსახლეობის რაოდენობა შემცირდა და მიგრაცია გაიზარდა, პარლამენტის პლენარულ სხდომაზე ჯანდაცვისა და სოციალურ საკითხთა კომიტეტის თავმჯდომარის პირველმა მოადგილემ დიმიტრი ხუნდაძემ უპასუხა.
„ბატონო ზურაბ და ბატონო მიხეილ, მაშინ, როდესაც გაეროს მოსახლეობის ფონდმა გააკეთა ღია განცხადება საქართველოში შექმნილი მძიმე დემოგრაფიული მდგომარეობის შესახებ, ერთი იყავით ქვეყნის პრეზიდენტი, ხოლო მეორე – ჯანდაცვისა და სოციალურ საკითხთა მინისტრი. სწორედ თქვენი მმართველობის პერიოდში, გაერომ მიგითითათ, რომ თუ შესაბამის ზომებს არ მიიღებდით, 2050 წლისთვის საქართველოს მოსახლეობას მკვეთრი შემცირება ემუქრებოდა. დიახ, სოციალური და ეკონომიკური მდგომარეობა კავშირშია დემოგრაფიულ მონაცემებთან, მაგრამ, მსოფლიო ბანკის მონაცემებით, 2010-2012 წლებთან შედარებით, საქართველოში სიღარიბის მაჩვენებელი მკვეთრად არის შემცირებული.
მინდა გკითხოთ ამ დარბაზში მსხდომ დეპუტატებს, ვინმეს გახსოვთ ყოფილი პრეზიდენტის ან ჯანდაცვის ყოფილი მინისტრის განცხადება საქართველოს დემოგრაფიულ მდგომარეობაზე? ასეთს ვერ გაიხსენებთ. სამაგიეროდ, სააკაშვილის ხელისუფლებამ გააუქმა მრავალშვილიანი ოჯახისა და მარტოხელა მშობლის სტატუსი. აღარ ვსაუბრობ რეგიონების მიზანმიმართულ დაცლაზე და თბილისიზაციაზე. თქვენ გამოაცხადეთ საყოველთაო პატიმრობა და ათიათასობით რეპროდუქციული ასაკის მქონე ახალგაზრდა ციხეში გამოამწყვდიეთ. თქვენი ერთადერთი დემოგრაფიული ინიციატივა იყო „ლაზიკას“ პროექტი, სადაც გსურდათ დიდი რაოდენობის უცხო ქვეყნის მოქალაქეებით შეგევსოთ საქართველოს კლებადი მოსახლეობა.
თქვენგან განსხვავებით, ჩვენ სულ რამდენიმე წელში მილიონობით ლარი დავხარჯეთ საქართველოს დემოგრაფიული მდგომარეობის გასაუმჯობესებლად. განვახორციელეთ არაერთი ინიციატივა: მშობიარობის დაფინანსება, დეკრეტული შვებულების გაზრდა, ყოველი მესამე და შემდგომი ახალშობილის დაფინანსება 6 რეგიონში; ავამოქმედეთ „მთის კანონი“, აბორტები მიღებული კანონების შედეგად შევამცირეთ 10 000-ით, აღვადგინეთ მარტოხელა მშობლის სტატუსი და ა.შ. დღეს კი მალე მივიღებთ მრავალშვილიანი მშობლის სტატუსს და ვამზადებთ მათთვის სოციალურ პაკეტს.
რაც შეეხება მიგრაციის ზრდას, აქაც სპეკულირებთ. მიგრაციის ზრდა ეს არის ვიზალიბერალიზაციის თანმდევი პროცესი და კარგად იცით, აღმოსავლეთ ევროპის თუ ბალტიისპირეთის სახელმწიფოებში, ვიზალიბერალიზაციის შედეგად რამდენჯერმე მაღალი იყო მიგრაციის კოეფიციენტი, ვიდრე დღეს ჩვენთნ არის.
ოფიციალური სტატისტიკის მონაცემებით, საქართველოში 2002 – 2013 წლებში, ანუ, ძირითადად სწორედ თქვენი მმართველობის პერიოდში ქვეყნიდან გავიდა 740 000 მოქალაქე. ეს ბევრად უფრო მეტია, ვიდრე 90-იან წლებში გასული მოსახლეობა. თქვენ გამუდმებით ატყუებთ ხალხს, მაგრამ ამ ციფრების წაშლას ვერ მოახერხებთ. დღეს საქართველოში შექმნილი უმძიმესი დემოგრაფიული მდგომარეობა სწორედ თქვენი პოლიტიკური პასუხისმგებლობის საკითხია და როგორი ყალბი ცრემლებიც არ უნდა ღვაროთ პოლიტიკური ქულებისთვის, ამ პასუხისმგებლობას ვერ გაექცევით,“-განაცხადა დიმიტრი ხუნდაძემ.
დიმიტრი ხუნდაძე სააკაშვილს და ჭიაბერაშვილს – როგორი ყალბი ცრემლებიც არ უნდა ღვაროთ, პასუხისმგებლობას ვერ გაექცევით
2018/04/04 20:01:00
კომენტარები
ნანახია: 944 ჯერ