სტეფანწმინდაში, მყინვარწვერზე 3600 მეტრ სიმაღლეზე დაზიანებული ალპინისტების ევაკუაციის განსახორციელებლად სამაშველო ღონისძიება განახლდა. ამის შესახებ ნათქვამია საგანგებო სიტუაციების მართვის სააგენტოს მიერ გავრცელებულ ინფორმაციაში.
”6 აპრილს, 08:00 საათზე განახლდა სამაშველო ღონისძიება სტეფანწმინდაში, მყინვარწვერზე 3600 მეტრ სიმაღლეზე დაზიანებული ალპინისტების ევაკუაციის განსახორციელებლად.
მეტეოსადგურიდან ვერტმფრენით ჩამოყვანილია ორი მოქალაქე. მათ სიცოცხლეს საფრთხე არ ემუქრება”, – ნათქვამია ინფორმაციაში.
მათივე ცნობით, ბელგიის სამეფოს გარდაცვლილი მოქალაქე 4900 მეტრის სიმაღლიდან უკვე გადმოასვენეს.
შეგახსენებთ, რომ მყინვარწვერზე მყოფი 4 მთამსვლელიდან ერთ-ერთს სავარაუდოდ ფეხი დაუცდა, რის შედეგადაც სხეულის დაზიანებები მიიღო. მთამსვლელი მიღებული დაზიანებების შედეგად გარდაიცვალა.
შსს-მ მომხდარზე გამოძიება სისხლის სამართლის კოდექსის 116-ე მუხლით დაიწყო, რაც გაუფრთხილებლობით სიცოცხლის მოსპობას გულისხმობს.