„მე მგონია, გედევან ფოფხაძემაც არ უნდა დატოვოს უმრავლესობა, ჩვენ შევიკრიბებით და თუ რაღაც ისეთი ჩარჩოები იქნება, რაც ჩემს პირად ღირსებასთან არ იქნება თანხვედრაში, მაშინ მივიღებთ გადაწყვეტილებას“, – ამის შესახებ საპარლამენტო უმრავლესობის წევრმა ნუკრი ქანთარიამ „ქართულ ოცნებაში“ არსებული ვითარების კომენტირებისას განაცხადა.
„მე პირადად არავითარი ამბიცია რაიმე თანამდებობის დაკავების არ მაქვს. მინდა, მხოლოდ აღვასრულოთ ის, რასაც ამომრჩეველს დავპირდით და ვიყოთ მუდმივად ფხიზლად. გედი ფოფხაძის ერთგვარმა ემოციურმა, ნაჩქარევმა გადაწყვეტილებამ გააშიშვლა გარკვეული პრობლემები. არ ვიცი რამდენი ადამიანია ამ ე.წ. სიაში და ახლა დაიწყო ცოტა მძიმე მუხლებით საუბარი. თუ ასეთი მძიმე მუხლებია, ვურჩევდი ფრაქციის თავმჯდომარეს, მას შეუძლია დააყენოს ფრაქციიდან გარიცხვის საკითხი. მე მგონია, რომ ეს 4 თუ 5 ადამიანი გამოხატავს უმრავლესობის უმრავლესობის პოზიციას, რადგან ჩვენ გვაქვს საუბრები ერთმანეთთან. ასე რომ, ყველამ ჩავიხედოთ ჩვენს გულში, რა შეცდომები დაგვიშვია და რას ვუშვებთ”, – განაცხადა ქანთარიამ.
დეპუტატი მიიჩნევს, რომ გედევან ფოფხაძემ უმრავლესობა არ უნდა დატოვოს.
„მე მგონია, გედევანმაც არ უნდა დატოვოს უმრავლესობა. ჩვენ შევიკრიბებით, თუ რაღაცა ისეთი ჩარჩოები იქნება, რაც ჩემს პირად ღირსებასთან არ იქნება თანხვედრაში და ჩემი პირადი, პიროვნული თავისუფლება იქნება შეზღუდული, მაშინ მივიღებთ გადაწყვეტილებას, მაგრამ ერთად უნდა მოვიფიქროთ და მოვახდინოთ გარკვეული ურთიერთობების ფორმები. ვფიქრობ, საჭიროა შიდა ნორმები თუ რა შეიძლება ითქვას შიგნით, რა გარეთ. მგონია, რომ ამაში ცუდი არაფერი არ არის. თუ რა თქმა უნდა არ იქნება მარწუხების მსგავსი, როგორიც „ნაციონალური მოძრაობის“ დროს იყო, ხმას რომ ვერ იღებდა ვერავინ”, – აღნიშნა ქანთარიამ.