„არც გედევან ფოფხაძის გამოსვლა მომეწონა, როცა განაცხადა, რომ კენჭისყრის შემდეგ უმრავლესობას დატოვებდა და არც ირაკლი კობახიძის გამოსვლა მომეწონა, სადაც თქვა, რომ გედევან ფოფხაძემ უმრავლესობის წევრებს შეურაცხყოფა მიაყენა“, – ამის შესახებ საპარლამენტო უმრავლესობის წევრმა, რევაზ არველაძემ ჟურნალისტებთან საუბრისას განაცხადა.
ამასთან, არველაძე ამბობს, რომ უმრავლესობაში ცვლილებებსა და დიდ ექსცესებს არ ელოდება.
„საბჭოთა კავშირის დროს ისე იყო, რომ ყველას პირი უთოთი გადავლილი უნდა ჰქონოდა და რასაც ერთი კაცი იტყოდა, ყველას ისე უნდა ეფიქრა და ეაზროვნა. აზრთა სხვადასხვაობა ჩვეულებრივი ამბავია. არ მომწონს, როცა ეს ყველაფერი პლენარულ სხდომაზე ხდება და ტელევიზიებით მიმდინარეობს. არც ერთი და არც მეორე გამოსვლა არ მომეწონა. საუბარი იმაზე, რომ იმპიჩმენტის პროცესი დაიწყოს, სწორი არ იქნება“, – განაცხადა რევაზ არველაძემ.
მისი თქმით, გიორგი კვირიკაშვილი წამყვანი ფიგურა, პარტია „ქართული ოცნება-დემოკრატიული საქართველოს“ თავმჯდომარეა და მასთან პარტიაში სხვადასხვა საკითხზე მსჯელობა იმართება.
„რაც შეეხება გიორგი კვირიკაშვილს, ის პარტიის თავმჯდომარეა. წამყვანი ფიგურაა და როგორც ვიცი, გადაწყვეტილებებს ერთპიროვნულად არ იღებს. პარტიაში მოდის და ამა თუ იმ საკითხზე მსჯელობა გვაქვს. არც გედევან ფოფხაძის გამოსვლა მომეწონა, როცა განაცხადა, რომ კენჭისყრის შემდეგ უმრავლესობას დატოვებდა და არც ირაკლი კობახიძის გამოსვლა მომეწონა, სადაც თქვა, რომ გედევან ფოფხაძემ უმრავლესობის წევრებს შეურაცხყოფა მიაყენა“, – განაცხადა არველაძემ.