სულხან მოლაშვილის მამამ რამდენიმე წლის წინ, “გზისთვის” მიცემულ ინტერვიუში მისი მეორე ვაჟის, თორნიკეს შესახებაც ისაუბრა.
“სულხანი რომ დაიჭირეს, ჩემი მეორე შვილი წამოვიდა პოლიციიდან. მაშინ ბარამიძემ დაიბარა და უთხრა, – არსად არ წახვალ, შენს ადგილზე იმუშავებო, – მაგრამ თორ¬ნიკემ უარი თქვა… დიდი ხნის შემდეგ, გურამ დონაძის (თორნიკე მასთან მეგობრობდა) მეშვეობით, თორნიკე შს სამინისტროში მიიყვანეს და უთხრეს, დეპარტამენტის თავმჯდომარედ დაგნიშნავთო. ბოლოს ვანო მერაბიშვილთან რომ შევიდა, მას უთქვამს, – სულხანს უთხარი, სტრასბურგიდან საჩივარი გამოიტანოსო. – სავაჭროდ არ მოვსულვარ, აქვე რომ დამიჭიროთ და სულხანმა საჩივარი გამოიტანოს, ახლავე ვენებს გადავიჭრიო, – უთქვამს თორნიკეს ვანოსთვის. ეს გეგმა ჩაუფლავდათ. ამის შემდეგ ბევრი დრო გავიდა და თორნიკემ მითხრა, – მამა, დამდევენ და მგონი, დამაკავებენო. მართლაც დააკავეს. მერე ადეიშვილის გამოგზავნილი კაცი მოვიდა და მითხრა, – დილის 9 საათზე სულხან მოლაშვილი რომ შეიტანს ევროსასამართლოში თხოვნას საჩივრის გამოტანის თაობაზე, 3 საათზე პროცესი დაინიშნება და 6 საათზე შენი შვილი უკვე სახლში გეყოლებაო. მათთან სულხანიც ვალაპარაკე. იკითხა, – საჩივრის გამოტანაზე განცხადებას რომ დავწერ, მაშინ გამოუშვებთ ჩემს ძმას, თუ საქმის განხილვის მერეო? ის კაცი ისევ ადეიშვილთან გაიქცა და პასუხად მივიღეთ, რომ განხილვის შემდეგ გაუშვებდნენ. 7 წელია, განაჩენს ელოდება და ვინ იცის, კიდევ როდის განიხილავენ, – ე.ი. მანამდე იქ უნდა მჯდა¬რიყო… ეგონათ, ასე გავბრიყვდებოდით. თორნიკე დღემდე პატიმრობაში რჩება. ნარკოტიკის შენახვის ბრალდება წაუყენეს და 8 წელი მიუსაჯეს. ასე მოექცა სააკაშვილის რეჟიმი ჩემს ოჯახს, ეს არის მათი სამართალი!”-განაცხადა თამაზ მოლაშვილმა.