ნატო საქართველოსთვის არსებითი პაკეტის გაძლიერებას გეგმავს

ნატოს ოფიციალურ ვებგვერდზე ვარშავის სამიტის დღის წესრიგის შესახებ ინფორმაცია გამოქვეყნდა, რომელშიც საქართველოზეა საუბარი. როგორც მასალაშია ნათქვამი, ალიანსი საქართველოს არსებითი პაკეტის გაძლიერებას აპირებს.
“ნატო გააძლიერებს ნატო-საქართველოს არსებით პაკეტს, ჩრდილოატლანტიკური ალიანსი გააგრძელებს აღმოსავლეთის მიმართულების პარტნიორების – უკრაინის, საქართველოსა და მოლდავეთის თავდაცვისუნარიანობის გაძლიერებას, რათა მათ გარედან მომავალ ზეწოლას გაუძლონ და გააგრძელონ რეფორმები. ასევე ნატო გააძლიერებს უკრაინის პოლიტიკურ და პრაქტიკულ მხარდაჭერას ყოვლისმომცველი პაკეტის ფარგლებში“, – ნათქვამია ჩრდილოატლანტიკური ალიანსის განცხადებაში.
ამასთან, განცხადებაში აღნიშნულია, რომ ნატო გააგრძელებს საქართველოსთან მუშაობას შავი ზღვის რეგიონში უსაფრთხოების უზრუნველყოფის მიზნით.
“ნატო გააგრძელებს მჭიდრო მუშაობას თავის პარტნიორებთან, ისეთებთან როგორიცაა ფინეთი, შვედეთი და საქართველო. ამ ქვეყნებს მნიშვნელოვანი წვლილი შეაქვთ ბალტიისა და შავი ზღვის რეგიონების უსაფრთხოების უზრუნველყოფაში”, – ნათქვამია ნატოს ვებგვერდზე გამოქვეყნებულ მასალაში.
როგორც ნატოს განცხადებაშია აღნიშნული, ვარშავის სამიტი ჩრდილოატლანტიკური ალიანსის უსაფრთხოებისთვის ძალიან მნიშვნელოვან და გადამწყვეტ დროს იმართება. ცნობისთვის, ნატოს სამიტი ვარშავაში 8-9 ივლისს გაიმართება.