„სამწუხაროა, რომ დიპლომატიური კორპუსის წარმომადგენელს, ჩვენი მეგობარი ქვეყნის ელჩს უწევს მიხეილ სააკაშვილის აბსურდულ განცხადებებზე პასუხის გაცემა“, – ამის შესახებ ჟურნალისტებს თბილისის მერმა კახა კალაძემ განუცხადა.
კალაძის თქმით, „ყოფილი პრეზიდენტი, თავისი ტელევიზიის მეშვეობით ყოველთვის ცდილობს, ბიძინა ივანიშვილს რაღაცეები დააბრალოს და სიცრუის ტირაჟირება მოახდინოს, რათა იყოს აქტიური და იყოს დღის წესრიგში“.
„ამის გაკეთებას სხვადასხვა სიცრუით ცდილობს, თუმცა სხვა თემაა, რამდენად გამოსდის. ნამდვილად სამწუხაროა, რომ საკუთარი განცხადებებით ქვეყანას აყენებს ზიანს. ჩვენ ვთქვით, რომ სისულელე იყო განცხადებები, რაც მისი მხრიდან გაჟღერდა. სამწუხაროა, რომ დიპლომატიური კორპუსის – ჩვენი მეგობარი ქვეყნის წარმომადგენელს უწევს აბსურდულ განცხადებებზე პასუხის გაცემა. ამის დასტურია საფრანგეთის ელჩის განცხადება მის უაზრო ბოდვებზე“, – განუცხადა ჟურნალისტებს კახა კალაძემ.