„ახალი სამთავრობო პროგრამა, რომელსაც ჩვენ ველოდებით პრემიერ-მინისტრობის კანდიდატისგან, არის ჩვენი ქვეყნის სწრაფი განვითარება, რომელიც პირდაპირ უნდა აისახოს მოსახლეობაზე“, – ამის შესახებ პარლამენტის თავდაცვისა და უშიშროების კომიტეტის თავმჯდომარემ, ირაკლი სესიაშვილმა განაცხადა.
მისივე თქმით, პრემიერ-მინისტრობის კანდიდატმა, მამუკა ბახტაძემ თავადაც ისაუბრა ძირითად მიმართულებებზე. როგორც სესიაშვილმა აღნიშნა, მმართველი გუნდის მიზანია ეკონომიკური პრობლემები სწრაფად და ადეკვატურად აღმოიფხვრას.
„საქართველოს ეკონომიკურ განვითარებას აქვს სერიოზული საერთაშორისო წარმატებები, თუმცა ჩვენ ამ მაჩვენებლებს ვერ დავჯერდებით, რადგან მოსახლეობასაც ეზრდება მოთხოვნილებები. ასევე, ვხედავთ სოციალურ პრობლემებს. ჩვენი მიზანია, ეკონომიკურ პრობლემებს სწრაფად და ადეკვატურად ვუპასუხოთ“, – აღნიშნა სესიაშვილმა.