დღეს წმინდა სინოდის სხდომა გაიმართება. შეხვედრა 12:00 საათზეა დანიშნული. განსახილველი საკითხები უცნობია, თუმცა სინოდის სხდომაზე უკრაინის მიერ ავტოკეფალიის მოთხოვნა განხილვის ერთ-ერთი საკითხი იქნება.
უკრაინას ავტოკეფალიის საკითხში საქართველოს პატრიარქის მხარდაჭერის იმედი აქვს. პატრიარქის მდივანმა, დეკანოზმა მიქაელ ბოტკოველმა თქვა, რომ 5 ივნისს რუსეთის საპატრიარქოს საგარეო განყოფილების ხელმძღვანელი მიტროპოლიტი ილარიონი თბილისში, საქართველოს კათოლიკოს პატრიარქს, ილია მეორეს შეხვდა. რუსეთის მიტროპოლიტმა და ილია მეორემ უკრაინის ავტოკეფალიაზეც ისაუბრეს.
ამჟამად უკრაინაში არსებობენ მოსკოვის საპატრიარქოს კანონიკური უკრაინული ეკლესია და ორი არაღიარებული – კიევის საპატრიარქოს მართლმადიდებელი ეკლესია და უკრაინის მართლმადიდებელი ეკლესია.
თუ მსოფლიო პატრიარქი უკრაინის მიმართვას დააკმაყოფილებს, უკრაინის გაერთიანებული ავტოკეფალიური ეკლესია კვლავ დაექვემდებარება კონსტანტინოპოლის ეკლესიას, როგორც ეს იყო 998 წლიდან 1686 წლამდე. კიევის მიტროპოლია მოსკოვის საპატრიარქოს 1686 წელს შეუერთდა.
ასევე შესაძლოა დეკანოზ გიორგი მამალაძის საქმეზეც იმსჯელონ. მისი უფლებადამცველი მიხეილ რამიშვილი ამბობს, რომ საპატრიარქო მოკვლევას ატარებს ე.წ ციანიდის საქმეზე და შესაძლოა ამ კუთხით იყოს განხილვა. ასევე რამიშვილი არ გამორიცხავს რომ სამღვდელოების ნაწილმა მამა გიორგი მამალაძისათვის დეკანოზის წოდების ჩამორთმევაც მოითხოვოს.
2017 წლის 5 სექტემბერს, მოსამართლე ბესიკ ბუგიანაშვილმა დეკანოზ გიორგი მამალაძეს 9 წლით თავისუფლების აღკვეთა მიუსაჯა. განაჩენი ორივე მხარემ გაასაჩივრა. პროკურატურა განაჩენის დამძიმებას, დაცვა კი გამამართლებელ განაჩენს ითხოვს.
გიორგი მამალაძე მკვლელობის მომზადების ბრალდებით თბილისის აეროპორტში 10 თებერვალს დააკავეს. ის ბერლინში მიფრინავდა, სადაც საქართველოს პატრიარქს ოპერაციისთვის ამზადებდნენ.
წმინდა სინოდის სხდომა წელს პირველად ტარდება. საპატრიარქოს ინფორმაციით, სხდომას საქართველოს კათოლიკოს-პატრიარქი, უწმინდესი და უნეტარესი, ილია მეორე უხელმძღვანელებს.
წმინდა სინოდის სხდომა წელიწადში ორჯერ ტარდება. 2017 წელს სინოდის სხდომა 9 მარტს და 11 ოქტომბერს გაიმართა.