ძალიან მნიშვნელოვანია, რომ არც ერთი დამატებული ინფიცირების შემთხვევა არ არის ახალი კლასტერი, – ამის შესახებ მთავრობის ადმინსიტრაციაში უწყებათშორისი კომისიის სხდომის დასრულების შემდეგ გამართულ ბრიფინზე დაავადებათა კონტროლის ეროვნული ცენტრის დირექტორის მოადგილემ განაცხადა.
„განსაკუთრებული ყურადღების ქვეშ არის ისევ და ისევ ერთი ქალბატონი, რომელიც გადმოყვანილია მარნეულიდან, კიდევ არის რამდენიმე საყურადღებო ავადმყოფი, დანარჩენების მდგომარეობა დამაკმაყოფილებელია და რამდენიმე პაციენტი კიდევ ემზადება გაწერისთვის. 4 ადამიანი არის მარნეულიდან იმ ქალბატონის ოჯახის წევრი, რომელიც ამჟამად თბილისშია ჰოსპიტალიზირებული. გამოკვლეული იქნა ასევე მარნეულში სხვა პაციენტები, რომლებიც იმ საავადმყოფოში იმყოფებოდნენ, სადაც ინფიცირებული ქალბატონი იწვა, ასევე „ჯეო ჰოსპიტალის“ პერსონალი, ისინი ამ ეტაპზე ტესტიტრების შედეგად უარყოფითები არიან. უკვე ფიქსირდება ახალი ქვეყანა, თურქეთიდან შემოტანილი შემთხვევა, დაემატა აშშ-იდან შემოტანილ კლასტერში შემთხვევები, ისევ და ისევ შემოსული და ოჯახის წევრზე გადაცემა, ასე, რომ შემოტანილი ვირუსის გეოგრაფია საკმაოდ გაფართოვდა“, – აღნიშნა პაატა იმნაძემ.