ბულგარეთის დედაქალაქ სოფიასთან ახლოს მდებარე კავშირგაბმულობის ობიექტზე ორმა ნიღბიანმა პირმა შეაღწია და “სტარლინკის” სატელიტური კავშირის 17 ანტენიდან 11 დაწვა. ინფორმაციას ბულგარეთის ეროვნული ტელევიზია (BNT) ავრცელებს.
ინციდენტს ბულგარეთის პარლამენტის წევრი ივაილო მირჩევიც გამოეხმაურა. დეპუტატმა ხანძრის ამსახველი ვიდეომასალა გაავრცელა და აღნიშნა, რომ ანალოგიური შემთხვევა სექტემბერში პოლონეთშიც დაფიქსირდა.
მირჩევის განცხადებით, ხელისუფლებას ეჭვი არ ეპარება, რომ დივერსიების უკან რუსეთი დგას.
“ცხადია, ეს ანტენები სამიზნედ შემთხვევით არ შეურჩევიათ, რადგან სწორედ ისინი უზრუნველყოფენ თანამგზავრებთან ძირითად კავშირს”, – განაცხადა დეპუტატმა.
ამ ეტაპზე არ ზუსტდება, გამოიყენებოდა თუ არა დაზიანებული ანტენები უკრაინის შეიარაღებული ძალების კომუნიკაციისთვის.
პარალელურად, 14 ოქტომბერს უკრაინის შეიარაღებულმა ძალებმა განაცხადეს, რომ კომპანია SpaceX-მა უკრაინელი სამხედროებისთვის “სტარლინკის” სატელიტური კავშირის მუშაობა შეზღუდა.
შეზღუდვა შეეხო სისტემის სამხედრო ვერსიას – Starshield-ს, რომელიც უპილოტო საფრენი აპარატების ოპერატორების მუშაობისთვის არის აუცილებელი.
უკრაინელი სამხედროების ინფორმაციით, კავშირის შეფერხების გამო რამდენიმე დრონმა ფრენისას სიგნალი დაკარგა, დაგეგმილი ოპერაციების ნაწილი კი ჩაიშალა.