პარლამენტის თავდაცვისა და უშიშროების კომიტეტის თავმჯდომარემ სტრასბურგის სასამართლოს მიერ ე.წ. ციხის ბუნტის საქმეზე გამოტანილი განაჩენი შეაფასა. როგორც ირაკლი სესიაშვილმა „იმედის“ გადაცემა „ღია ეთერში“ განაცხადა, მომხდარი უბრალოდ ბუნტის ჩახშობა არ იყო, სასამართლოს განაჩენი კი მოულოდნელი არავისთვის აღმოჩნდა.
„შეფასებები კიდევ იქნება, იმიტომ რომ არ შეიძლება რეალობა შეცვალო ტყუილებით და სიცრუით. და ჩვენ მუდმივად ვხედავთ, რომ იგივე პოლიტიკური მედიის მხრიდან მიდის მიზანმიმართული სიცრუის ტირაჟირება, სიცრუის გავრცელება, მცდელობა იმისა, რომ ეს ყველაფერი „გაპრავდეს“ – ადამიანების სიკვდილი, მკვლელობა, წამება და ეს იყო მათი ჩვეულებრივი ცხოვრების წესი“, – განაცხადა სესიაშვილმა.
მისივე თქმით, „ნაციონალური მოძრაობის“ ხელისუფლების მიზანი მოსახლეობის დაშინება იყო, რათა მიხეილ სააკაშვილს ძალაუფლება შეენარჩუნებინა. სწორედ ამის მაგალითი იყო ბუნტის ჩახშობა.
„ეს არ იყო უბრალოდ შემთხვევით ჩატარებული სპეცოპერაცია, რომელსაც მძიმე შედეგი მოჰყვა. ეს გახლდათ მიზანმიმართული, რომ ხალხს დაენახა, რომ აი ასე სასტიკად ეპყრობოდნენ. და შესაბამისი ობიექტიც სწორად იყო შერჩეული, იმიტომ რომ კანონიერი ქურდების მიმართ არავის ჰქონდა ისეთი დამოკიდებულება. იგივე მოხდა 26 მაისს, გაიხსენეთ, როცა დემონსტრაციულად, პირდაპირ ეთერში გვაყურებინეს ადამიანებს როგორ გამეტებით აწამებდნენ და ძალადობდნენ. გვაყურებინებდნენ იმიტომ, რომ ეს უნდა გამჯდარიყო ჩვენს ცნობიერებაში, რომ ეს არის ხელისუფლება, რომელიც უნდა ავიტანოთ და მადლობა ღმერთს, რომ ამ ყველაფერზე პასუხი გაიცა 2012 წელს“,- განმარტა სესიაშვილმა.
მისი თქმით, „ნაციონალური მოძრაობა“ დღემდე არ იღებს პასუხისმგებლობას მომხდარზე, სტრასბურგის გადაწყვეტილება კი იმ ხელისუფლების მორიგი განაჩენი გახდა.
2006 წლის ე.წ. „ციხის ბუნტის“ დროს მოკლული 7 და დაშავებული 22 პატიმრის საქმეზე სტრასბურგის სასამართლომ სიცოცხლის უფლების მრავლობითი დარღვევა დაადგინა. სტრასბურგის გადაწყვეტილება საქმეზე „კუხალაშვილი და სხვები საქართველოს წინააღმდეგ“ 2 აპრილს გამოქვეყნდა.