ყველაზე გაუგონარი, არაადეკვატური და აბსურდულია, რომ ის პოლიტიკური ძალები, რომლებიც სერიოზულად იყვნენ დაინტერესებული იმით, რომ საარჩევნო გარემო ყოფილიყო უკეთესი, მათ არჩევნებში წარმატებული შედეგის მისაღწევად უფრო მეტი შანსი ჰქონოდათ, უცებ აღარ იღებენ მონაწილეობას საარჩევნო სისტემის მხარდაჭერაში, არც საარჩევნო კოდექსზე მსჯელობაში, – ამის შესახებ პარტია „ერთიანი საქართველო – დემოკრატიული მოძრაობის“ ყოფილმა წევრმა, გიორგი ახვლედიანმა „POSTV“-ის ეთერში განაცხადა.
„როდესაც ამ საკითხზე მოლაპარაკებები მიმდინარეობდა, მათ ჰქონდათ ერთი ინტერესი, რომ რაღაც გაუმჯობესებულიყო და უფრო მეტი შანსი გასჩენოდათ, მაგრამ, როგოც ჩანს, ბოლო პერიოდში ეტყობა ეს ინტერესები შეიცვალა და დღეს არც „ნაციონალურ მოძრაობას“ და არც „ევროპულ საქართველოს“ აღარ აინტერესებთ გაუმჯობესებული საარჩევნო გარემო, რადგან ეს მათთვის მთავარი აღარ არის, რომ რაიმე შედეგი დადონ არჩევნებზე. მკაფიოდ გამოიკვეთა, რომ მათი ხელისუფლებაში დაბრუნების ერთადერთი შანსი, ერთადერთი შანსი იმისა, რომ რეალურად შედეგზე გავიდნენ, არის მხოლოდ და მხოლოდ სიტუაციის არეულობა და დაპირისპირება“, – განაცხადა გიორგი ახვლედიანმა.
პარლამენტმა საკონსტიტუციო ცვლილებები მესამე მოსმენით დაამტკიცა. კანონპროექტს მხარი დაუჭირა 117-მა დეპუტატმა, 3-მა კი წინააღმდეგ მისცა ხმა. რეგისტრაცია გაიარა 120-მა დეპუტატმა. კენჭისყრაში „ნაციონალური მოძრაობა“ და ევროპული საქართველო“ არ მონაწილეობდა.