ირაკლი კვარაცხელიამ, რომელიც ზუგდიდში, “საქართველოს ბანკში” მომხდარი ინციდენტისას თავდამსხმელს მძევლად ჰყავდა აყვანილი, “კურიერთან” განაცხადა, რომ თავდამსხმელი ყოფილი ჯარისკაცის შთაბეჭდილებას ტოვებდა.
ირაკლი კვარაცხელიამ აღნიშნა, რომ დაინახა, როგორ გადასცეს მას ჩანთა, თუმცა, იყო თუ არა იქ ფული, ამის შესახებ ინფორმაცია არ აქვს.
“მაღალი ალბათობით, ყოფილი ჯარისკაცი იყო, ან სპეცრაზმელი – ასეთ შთაბეჭდილებას ტოვებდა. იარაღთან ურთიერთობის საკმაო გამოცდილება ჰქონდა და იოტისოდენადაც არ ეტყობოდა ნერვიულობა. მოლაპარაკების დროსაც მძევლის მეშვეობით ესაუბრებოდა და ეუბნებოდა, რომ ეს ხალხი, ვინც მას ჰყავდა მძევლად, რომ მშვიდობიანად წასულიყვნენ სახლში, ამის ერთადერთი შანსი იყო, თუ მას ფულს გადასცემდნენ და ის გარანტიას აძლევდა, რომ არავის არაფერი დაუშავდებოდა. მე ვნახე, მას ჩანთა როგორ გადასცეს, თუმცა, შიგნით რამდენი დოლარი იყო და იყო თუ არა საერთოდ დოლარი, არ ვიცი,“-განაცხადა ირაკლი კვარაცხელიამ.