ზუგდიდის მერი გიორგი შენგელია 28-ე საარჩევნო უბანზე მივიდა და საკუთარი არჩევანი გააკეთა. მან ჟურნალისტებთან კომენტირებისას განაცხადა, რომ ხმა მისცა მუნიციპალიტეტის წინსვლასა და პროგრესს.
მისივე თქმით, საარჩევნო უბნებზე დაცულია კორონავირუსთან დაკავშირებული ყველა რეგულაცია და ამომრჩევლებს მშვიდ გარემოში შეუძლიათ მონაწილეობა.
„31 ოქტომბერს ქართველმა ხალხმა გააკეთა სწორი არჩევანი, დღეს ჩვენ გავამყარებთ ჩვენს გამარჯვებას და საბოლოო წერტილს დავუსვამთ ამ ყველაფერს. რაც შეეხება კორონავირუსთან დაკავშირებულ რეგულაციებს, უსაფრთხოების ყველა ზომა დაცულია უბნებზე. მოვუწოდებ, თანამოქალაქეებს მოვიდნენ არჩევნებზე, დააფიქსირონ საკუთარი არჩევანი და მოიხადონ მოქალაქეობრივი პასუხისმგებლობა. აქვე მინდა ვთქვა, რომ ძალიან კომფორტულ და კარგ პიტოებებში მიმდინარეობს საარჩევნო პროცესი და მოქალაქეებს დემოკრატიულ გარემოში შეუძლიათ ხმის მიცემა.
პირადად მე, მივეცი ხმა კანდიდატს, რომელთან ერთადაც, დარწმუნებული ვარ, რომ შემდგომი 4 წლის განმავლობაში ის განვითარების ტემპი გაგრძელდება, რომელიც მიმდინარეობს. ადამიანს, რომელიც თითოეული ზუგდიდელის ღირსეული ხმა იქნება საკანონმდებლო ორგანოში და თითოეული წელი იქნება პროგრესი, როგორც ზუგდიდში ასევე მთლიანად ქვეყანაში.
კითვაზე, რამდენად იქნება აქტივობა ამომრჩევლის, იმ ფონზე როცა „ერთიანი ნაციონალური მოძრაობის“ კანდიდატი მეორე ტურს ბოიკოტს უცხადებს, შენგელიამ განაცხადა, რომ აქტივობა ამ წუთისთვისაც საკმაოდ მაღალია.
„დარწმუნებული ვარ, ამომრჩეველი კიდევ ერთხელ გააკეთებს სწორ არჩევანს, რაც შეეხება აქტივობას, აქტივობა ამ წუთისთვისაც არის საკმაოდ მაღალი და ზუგდიდელები დღის განმავლობაში საკუთარ არჩევანს გააკეთებენ. რაც შეეხება ოპონენტების ბოიკოტს, მათ ალბათ, წინასწარ იცოდნენ, რომ უპირობოდ დამარცხდებოდნენ და ეს არჩევანი გააკეთეს. ეს მათი გადასაწყვეტია. ჩვენ დემოკრატიულ და მშვიდ გარემოში ვატარებთ არჩევნებს“, – განაცხადა გიორგი შენგელიამ.
მაჟორიტარული არჩევნების მეორე ტური 17 ოლქში ტარდება. არჩევნების პირველ ტურში 13 ოლქში „ქართული ოცნების“ კანდიდატებმა გაიმარჯვეს. რაც შეეხება პროპორციულ სისტემას, ცესკოს ინფორმაციით, ბიულეტენების 100%-ის დათვლის შემდეგ შედეგები ასეთია: „ქართული ოცნება“ – 48,22%; „ნაციონალური მოძრაობა – გაერთიანებული ოპოზიცია“ – 27,18%; „ევროპული საქართველო“ – 3.79%; „ლელო“ – 3,16%; „პატრიოტთა ალიანსი“ – 3,14%; „სტრატეგია აღმაშენებელი“ –3,15 %; „გირჩი“ – 2,89%; „ალეკო ელისაშვილი – მოქალაქეები“ – 1,33%; „ლეიბორისტული პარტია“ – 1%. დანარჩენ პარტიებს ამომრჩეველთა ხმების ერთ პროცენტზე ნაკლები აქვთ.