31 ოქტომბრის არჩევნებთან დაკავშირებით, პარლამენტში კომისიის შექმნა და დადასტურება, თუ რა სახის გადახრა შეიძლება ყოფილიყო ან ამ გადახრის გამორიცხვა, მნიშვნელოვანია. კომისია გაცილებით სოლიდურ სამართლებრივ ბაზას შექმნის, უნდა ჩატარდეს თუ არა ვადამდელი არჩევნები, – ამის შესახებ პარლამენტის პირველმა ვიცე-სპიკერმა, გია ვოლსკიმ ჟურნალისტებთან საუბრისას განაცხადა.
„როცა ვსაუბრობთ ვადამდელ არჩევნებზე, ამას წინაპირობა უნდა ჰქონდეს. ამ წინაპირობისთვის საპარლამენტო კომისიის შექმნა და დადასტურება უნდა მოხდეს, რა სახის გადახრა შეიძლება ყოფილიყო, ან ამ გადახრის გამორიცხვა უნდა მოხდეს. საპარლამენტო კომისიის შეთავაზება გაცილებით მაღალი ლეგიტიმაციის შეთავაზებაა, ვიდრე რაღაც პლებისციტთან მიმსგავსებული თვითმმართველობის არჩევნების შედეგების სამართლებრივ ბაზად ქცევა. საპარლამენტო კომისია გაცილებით უფრო სოლიდურ ბაზას შეუქმნის ნებისმიერ გადაწყვეტილებას, უნდა ჩატარდეს თუ არა ვადამდელი არჩევნები. ალბათ, ეს საკითხი პოლიტსაბჭოზე განხილული იქნება, რაც ყრილობა ჩატარდება და ახალი პოლიტსაბჭო შეიკრიბება“, – განაცხადა გია ვოლსკიმ.