გიორგი გაბუნიას დაგეგმილი მკვლელობის საქმე – პროცესიდან გამოსული ჟურნალისტი ამბობს, რომ შესაძლოა, მან დღეს თავის პოტენციურ მკვლელს ჩახედა თვალებში. საბრალდებო სკამზე კი ვასმბეგ ბოკოვი იყო.
“ვერ ვიტყვი, ინფორმაციას აგროვებდა, მკვლელობას ამზადებდა თუ რა როლი ჰქონდა, მაგრამ ასე, ვიზუალურად რომ შეხედავ, ჰგავს. შესაძლოა, ეს იყოს ის, ქილერი, რომელსაც ჩემი ლიკვიდაცია უნდა მოეხდინა და მით უმეტეს, ამას მხოლოდ ვიზუალური მხარიდან გამომდინარე არ ვამბობ, ინფორმაციის მიხედვით,რომელიც მე სუსმა მომაწოდა, როდესაც დაზარალებულად მცნეს, მას აქვს გავლილი შესაბამისი ფიზიკური მომზადება, აქვს კრიმინალური წარსული, იძებნებოდა სხვადასხვა ქვეყანაში მკვლელობის საქმეებისთვის და ასე რომ, არ გამოვრიცხავ, დღეს მე ჩემს პოტენციურ მკვლელს ჩავხედე თვალებში”, – თქვა გიორგი გაბუნიამ.
ჟურნალისტის თქმით, მისი ლიკვიდაციის დაკვეთა პუტინისგან მოდის.
“როდესაც დამკვეთი არის პუტინი, რა თქმა უნდა, ეს ასე არ სრულდება და მე არ მაქვს იმის ილუზია და მოლოდინი, რომ ამ ერთი ადამიანის დაკავებით რუსეთის პრეზიდენტის შურისძიების სურვილი დასრულდა, – დაამატა გიორგი გაბუნიამ.