ევროპის საბჭოს საპარლამენტო ასამბლეაზე საქართველოსთვის ორ მნიშვნელოვან დოკუმენტს განიხილავენ. პირველად ასამბლეის წევრებს 2020 წლის საპარლამენტო არჩევნების შესახებ თავის დასკვნას ევროპარლამენტარი ტინი კოქსი წარუდგეს, დღის მეორე ნახევარშიც იქნება საუბარი საქართველოზე, როდესაც ასამბლეის წევრებს მონიტორინგის ჯგუფის დასკვნას წარუდგენენ.
„პირველივე დღიდან ძალიან მნიშვნელოვანია ის ანგარიშები, რომელიც საქართველოს ეხება. პირველი იქნება არჩევნების შეფასება სადამკვირვებლო მისიის მიერ. ჩვენ რა თქმა უნდა მივესალმებით იმ დადებით შედეგს, რომელიც აქ არის მოყვანილი. ამავე დროს ვაპირებთ ძალიან გულდასმით მოვისმინოთ რეკომენდაციები, რომელიც უკავშირდება იმ გარკვეულ ხარვეზებს, რომლებიც დაფიქსირდა არჩევნების დროს. უნდა აღინიშნოს, რომ ორივე ანგარიში საკმაოდ მკაფიოდ მოუწოდებს ოპოზიციას შეეგუონ იმ რეალობას, იმ შედეგებს, რომელიც არჩევნებში დაფიქსირდა და დაიკავონ მანდატები და ქუჩიდან გადაინაცვლონ პარლამენტში. ეს სხვათა შორის არა მხოლოდ ანგარიშში, ჩვენს კოლეგებთან შეხვედრის დროს ყველა იმეორებს ამას, რომ მათთვის გაუგებარია თუ რატომ იჭერენ ასეთ პოზიციას“, – ამბობს ქართული დელეგაციის ხელმძღვანელი, პარლამენტის ვიცე-სპიკერი კახა კუჭავა.