საპარლამენტო უმრავლესობის ლიდერი მამუკა მდინარაძე აცხადებს, რომ 2 თებერვლამდე მეხუთე რაუნდის მოლაპარაკებების გამართვის გასაღები ოპოზიციის ხელშია. როგორც მდინარაძემ “ღამის კურიერში” საუბრისას განაცხადა, ქართულმა ოცნებამ თავისი მაქსიმუმი შეთავაზება გაუკეთა ოპოზიციას და პოზიციას არ შეიცვლის.
მდინარაძის თქმით, ოპოზიციის რეიტინგი ისტორიულ მინიმუმზეა და ამის მაგალითად, NDI-ის კვლევის შედეგები მოაქვს. NDI-ის დეკემბრის კვლევით, მოსახლეობის მხოლოდ 31% პასუხობს, რომ მათ შეხედულებებთან ყველაზე ახლოს მმართველი პარტია, ქართული ოცნება დგას. ამავე საკითხზე 25% ამბობს, რომ არცერთი პარტია არ დგას ახლოს მათ შეხედულებებთან და მხოლოდ, 5% ასახელებს ერთიან ნაციონალურ მოძრაობას.
“რეალურად, მეხუთე რაუნდის გასაღები ოპოზიციასთანაა. მათ სურვილზეა დამოკიდებული და მათ მზაობაზე. ქართულმა ოცნებამ თქვა მაქსიმუმი და ჩვენ არ გვივაჭრია, ისინი ვაჭრობენ. როდესაც მესიჯი აქვთ დაზეპირებული და ამბობენ, რომ გაყალბებულია არჩევნები და ლამის რწმენამდე აიყვანეს გაყალბებული არჩევნების რწმენა და ერთმანეთს ამუნათებენ, რომ სხვანაირად არ უნდა ილაპარაკოს არავინ, მიუხედავად იმისა, რომ არგუმენტები აღარ არსებობს… NDI-ი დაემატა ბოლოს მტკიცებულებად. საერთაშორისო საზოგადოება, პარტნიორები, საერთაშორისო სადამკვირვებლო ორგანიზაციები, ქართული საზოგადოება და ბოლოს NDI-ი თავის კვლევით, რომელიც ეუბნება, რომ საშენო განწყობა არ არის და ისტორიულ მინიმუმზე დაეცა მათი რეიტინგი. ამის მიუხედავად ვერ მოიშალეს “გაყალბებული არჩევნების” ტერმინის გამო ერთმანეთის დამუნათება”, – აცხადებს მდინარაძე.
მდინარაძის თქმით, NDI-ის კვლევები ხშირად რეალობას იყო აცდენილი, მაგრამ მმართველ გუნდს პრეტენზია არა უშუალოდ ორგანიზაციასთან, არამედ საქართველოში საველე სამუშაოების ჩამტარებელთან ქონდა.
“ქართული საზოგადოების, პრაქტიკულად 2/3 იმ რესპოდენტებისა, რომელთაც პასუხი გასცა იყო ქართული ოცნების მხარეს და ცოტა მეტიც. მე მოვიტანე მთავარი, საერთაშორისო პარტნიორებისა და სადამკვირვებლო მისიების შეფასებები და ყველაზე მთავარი, ქართველი ხალხის განწყობა”, – აცხადებს მდინარაძე.