ნიკა მელიას დაპატიმრებასთან დაკავშირებით ,,კვირამ“ კომენტარი სთხოვა რეჟისორ ქეთი დოლიძეს:
-რომელიმე ცივილიზებულ ქვეყანაში ვინმეს სამაჯურის მოხსნა ეპატიება? არსად, არავის! ამერიკის შეერთებულ შტატებს, რომელიც ახლა უმაღლესი დემოკრატიის სტანდარტს მოითხოვს საქართველოსგან, ორიოდე თვის წინ კინაღამ თავზე დაემხო საკუთარი დემოკრატია. ვინმე არ დაიჭირეს და კაპიტოლიუმში შეჭრა აპატიეს?
-გაერთიანებული ოპოზიცია აცხადებს, რომ საქართველოში დემოკრატია საფრთხეშია.
-ყველაზე ამაზრზენი შალიკოს ფანჩატურში შეკრებილი ხალხია, რომელსაც, რატომღაც, ქართული ოპოზიცია ჰქვია. როგორ მოხდა მათი გაერთიანება, რა იდეოლოგიამ დაუკავშირა ერთმანეთს ნინო ბურჯანაძე და გიგა ბოკერია… სამწუხაროდ, ამ ქვეყანაში ისეთი კანონმდებლობაა, რომ გინდა თუ არა ეს უქნარები, რომლებსაც პარლამენტში მუშაობაც კი არ უნდათ, ჩვენი ჯიბით უნდა შევინახოთ. რატომ, გეკითხებით? ჩემზე განათლებულები არიან, პატიოსნები თუ ჩემზე უფრო უყვართ ეს ქვეყანა? რომელიმე მათგანმა მითხრას, რა გაუკეთებიათ საქართველოსთვის, გაჭირვებულს დახმარებიან, რომელიმე მაღალმთიან სოფელში რამე პროექტი განუხორციელებით, ქვეყნისთვის თავი დაუდიათ? რაც უფრო გაჭირვებულია სახელმწიფო, მით მეტი პარტიაა მასში დარეგისტრირებული. როგორც ჩანს, პარტია ამ ადამიანების შემოსავლის ერთადერთი წყაროა. ან სად იპოვნეს 10 000 მომხრე, რომლებმაც მათ ხელი მოუწერა და პარტიად დაარეგისტრირა? რომელი დემოკრატიულ დემოკრატიულ ქვეყანაშია 2-3 პარტიაზე მეტი?
-დემოკრატიულმა ქვეყნებმა დაგმეს ოპოზიციური პარტიის ლიდერის დაპატიმრება საქართველოში.
-სწორედ ამ დემოკრატიული ქვეყნების განცხადებებით მოხდა ის, რომ 8 წლის წინ, პარტია, რომელიც ახლა ციხეში უნდა იჯდეს, კვლავ მთავარ ოპოზიციურ ძალად აქციეს და თავზე დაგვასვეს. თავიანთ ქვეყნებში მოითმენდნენ ამდენ უსამართლობასა და კანონის უგულებელყოფას?
-ოპოზიცია პერმანენტულ აქციებს აანონსებს.
-მათ გვერდით არავინ დადგება. ქართველი ხალხი საკმაოდ ბრძენია იმისათვის, რომ კრიმინალების გვერდით დადგეს. ერთი რომ დაიძახოს ღარიბაშვილმა, გამოდით, ყველას დავანახოთ, რამდენნი ვართო, პირველი მე გავალ იმ დემონსტრაციაზე – მე, რომელიც კარგა ხანია, არანაირ პოლიტიკურ აქტივობაში მონაწილეობას აღარ ვიღებ. ქვეყანა ძალიან დაიღალა ამდენი უსამართლობით.