დასაქმების საიტმა jobs.ge-იმ “ალტ-ინფოს” განცხდების განთავსებაზე უარი უთხრა. ამის შესახებ jobc.ge-ის დამფუძნებელი ლექსო ხუბულავა სოციალურ ქსელში წერს და მიმოწერასაც აქვეყნებს.
“გაცნობებთ, რომ ჩვენ არ ვემსახურებით ორგანიზაციებს, რომლებიც ეწევიან ძალადობის პროპაგანდას უმცირესობების წინააღმდეგ და არღვევენ ცივილიზებული სამყაროს მიერ აღიარებულ ადამიანთა ფუნდამენტურ უფლებებს”, – წერია “ალტ-ინფოსთვის” გაგზავნილ პასუხში.
შეგახსენებთ, ალტ-ინფოს Facebook გვერდი „სამართლიანი არჩევნების“ შეტყობინების საფუძველზე წაიშალა.
„სამართლიანმა არჩევნებმა“ Facebook-ს მიმართა და ალტ-ინფოს მიერ მის პლატფორმაზე გაკეთებული სიძულვილის ენის შემცველი განცხადებებისა და ძალადობრივი ჯგუფების მობილიზების შესახებ აცნობა.
Facebook-ის შესაბამისი განყოფილების გადაწყვეტილებით, ალტ-ინფომ Facebook-ის გამოყენების წესები და პოლიტიკა დაარღვია.
„სამართლიანი არჩევნები“ აგრძელებს სოციალურ მედიაში გავრცელებული ძალადობის წამახალისებელი გზავნილების მონიტორინგს და სოციალური მედიის პლატფორმების ინფორმირებას.
შეგახსენებთ “ალტ-ინფო” ის მედიასაშუალებაა, რომელიც მოქალაქეებს 5 ივლისს ქუჩაში გამოსვლისკენ მოუწოდებდა. ამ დღეს სიძულვილის ჯგუფებმა 50-ზე მეტ ჟურნალისტს ფიზიკური შეურაცხყოფა მიაყენეს. ჟურნალისტების ნაწილი დაზიანებების გამო ამ დრომდე ვერ უბრუნდება სამუშაო სივრცეს.