ხუთი ოპოზიციონერი დეპუტატი შალვა პაპუაშვილს მიმართავს და სთხოვს, სხდომათა დარბაზში „ხალხის ძალის“ წარმომადგენლებს ადგილები შეუცვალოს.
დეპუტატები ამბობენ, ამ მოთხოვნის მიზეზი „ხალხის ძალის“ მხრიდან შეურაცხმყოფელი მიმართვებია.
„მე მივმართე წერილით თავმჯდომარეს, რასაც რამდენიმე დეპუტატი აწერს ხელს. პარლამენტის თავმჯდომარე ვალდებულია უზრუნველყოს წესრიგი სხდომაზე, ამიტომ ვთხოვე, სთხოვოს მისი უმრავლესობის წევრებს, რომ სხვაგან გადასხდნენ და არ იყოს ეს ადგილი მუდმივი დაპირისპირების კერა,“ – განაცხადა „რესპუბლიკური პარტიის“ თავმჯდომარე, ხათუნა სამნიძემ.
დღეს პარლამენტის პლენარულ სხდომაზე დეპუტატებს შორის სიტყვიერი და ფიზიკური დაპირისპირება მოხდა. კერძოდ, „ხალხის ძალის“ წევრმა ვიქტორ ჯაფარიძემ დამოუკიდებელ დეპუტატ ტარიელ ნაკაიძეს მიკროფონი ჩაარტყა. ფიზიკურ დაპირისპირებაში ჩაერთო უმრავლესობის წევრი ლევან მგალობლიშვილიც.