ეროვნული ბიბლიოთეკის დირექტორი გიორგი კეკელიძე გამოეხმაურა წყლის ჭავლთან მოცეკვავე გოგონას, სალომე კენჭიაშვილის დის, სოფია კენჭიაშვილის განცხადებას, რომლის თქმითაც, სალომე კენჭიაშვილმა გურული დღიურების ფონდის მიერ დაფუძნებულ მარო მაყაშვილის სახელობის სტიპენდიაზე უარი თქვა.
„მხოლოდ ფაქტები – სალომე კენჭიაშვილზე „რადიო თავისუფლების“ სიუჟეტი ვნახე. სპონტანურად მივწერე ჟურნალისტს და ვუთხარი, რომ ძალიან კარგი გოგოა და ვფიქრობ, რომ ურიგო არ იქნება სტიპენდია დავუნიშნო და ეგებ დამაკავშირო-მეთქი. მომცა ნომერი, დავურეკე და ვახარე. მასაც გაუხარდა. საერთოდ არ ვიცოდი, ვისი და იყო და ნათესავი, ან კი რა მნიშვნელობა ჰქონდა. სალომეს სტიპენდია დაერიცხა 17 მარტს (უკან დაგვიბრუნა გუშინ). ამ ხნის განმავლობაში მე ავიტანე საოცარ ცილისწამებათა კასკადი ამ ამბის გამო. გუშინ სალომეს და წერს იმას, რასაც წერს – წაიკითხავდით, ცხადია. არცერთ მედიას არ მივცემ კომენტარს, მათ შორის მათაც, ვინც ცდილობს, რომ სტიპენდიატის წინააღმდეგ მალაპარაკოს – სალომე არის შესანიშნავი გოგო და იმსახურებს საუკეთესოს. ჩვენ კი ვაგრძელებთ ჩვენს საქმეებს“, – წერს კეკელიძე Facebook-ზე.
წყლის ჭავლთან მოცეკვავე გოგონას და, სოფია კენჭიაშვილი გიორგი კეკელიძეს მიმართა და განაცხადა, რომ გიორგი კეკელიძის მიერ დანიშნულ სტიპენდიაზე უარს ამბობენ. მისი თმით, „სექსუალური მოძალადე მსგავსი მცდელობებით ვერ რეაბილიტირდება“.