“სააკაშვილის გარემოცვას რაიმე ხელმოსაჭიდი რომ ჰქონდეს იმისთვის, რომ დავა სტრასბურგში გაგზავნოს, ამას დიდი ხნის წინ გამოიყენებდა”

მიხეილ სააკაშვილის გარემოცვას რაიმე სახის ხელმოსაჭიდი რომ ჰქონდეს იმისთვის, რომ დავა სტრასბურგში გაგზავნოს, დამერწმუნეთ, ამას ისინი დიდი ხნის წინ გამოიყენებდა, – ამის შესახებ საპარლამენტო უმრავლესობის წევრმა, რატი იონათამიშვილმა სტრასბურგის სასამართლოში ექსპრეზიდენტ მიხეილ სააკაშვილის ადვოკატების სარჩელის გაგზავნაზე საუბრისას განაცხადა.

როგორც უმრავლესობის დეპუტატმა „ქრონიკაში“ აღნიშნა, სააკაშვილი ის პიროვნებაა, ვისი კრიმინალური ბუნების შესახებ ყველაზე კარგად ევროპულმა სასამართლომ იცის და ის და მისი რეჟიმი 50-ზე მეტ საქმეზე ჰყავს გასამართლებული.

„ამ ადამიანებს რომ ჰქონდეთ რაიმე სახის ხელმოსაჭიდი იმისთვის, რომ დავა სტრასბურგში გაგზავნონ, დამერწმუნეთ, ისინი ამას დიდი ხნის წინ გამოიყენებდნენ. მაგრამ ასეთი არგუმენტი არ გააჩნიათ და უფრო მეტიც, ის კი არა, რომ დავა აწარმოონ საქართველოს წინააღმდეგ სტრასბრუგში, არამედ წარმოებაში რომ მიიღოს ევროპულმა სასამართლომ, ამისი სამართლებრივი საფუძვლებიც კი არ გააჩნიათ. ისინი ცდილობენ, რომ სიცრუეზე აგებული კამპანია რამენაირად უფრო დიდხანს გაგრძელდეს, ვიდრე ეს ერთი შეხედვით ჩანს. სტრასბურგი დაასრულებს ტყუილების კამპანიას ამ მიმართულებით, ამიტომ არ აგზავნიან“, – განაცხადა რატი იონათამიშვილმა.

გასაჩივრდება თუ არა სასამართლოს ორი ინსტანციის უარი სააკაშვილის სასჯელისგან გათავისუფლება-გადავადებასთან დაკავშირებით, ამ საკითხზე პატიმრის ოჯახსა და უფლებადაცველებს ერთიანი პოზიცია არ აქვთ. გიული ალასანია ამტკიცებს, რომ სარჩელი მზად არის, ადვოკატი კი ამ ინფორმაციას არ ადასტურებს.