მოსმენების კანონპროექტის შესახებ „ახალი თაობას“ პარლამენტის თავდაცვისა და უშიშროების კომიტეტის თავმჯდომარე ირაკლი სესიაშვილი ესაუბრა:
„მრჩება შთაბეჭდილება, რომ რა სახის კანონპროექტიც არ უნდა მოგვემზადებინა, ოპოზიცია, სამოქალაქო სექტორი და, ვფიქრობ, პრეზიდენტიც, განწყობილი იყო იმისთვის, რომ ყოფილიყო კრიტიკული. ეს თავიდანვე ჩანდა. ამ კანონის შინაარსი არის ქვეყნის უსაფრთხოება და სამოქალაქო უფლებებისა და ინტერესების დაცვა, მათ შორის საუკეთესო ოქროს შუალედის პოვნა. ყველამ იცის, რომ პასუხისმგებლობა ეკისრება ხელისუფლებას და აქ იდეალური მოდელის შექმნა წარმოუდგენელია! ჩვენ საზოგადოებას შევთავაზეთ ის მოდელი, რომელიც, პირველ რიგში, მოითხოვა საკონსტიტუციო სასამართლომ, რომლის გადაწყვეტილებაც იყო აბსოლუტურად არაკვალიფიციური და ეს შესაძლოა პოლიტიკურად დაინტერესებული გადაწყვეტილება იყო! სისტემა გაცილებით უკეთესია სამოქალაქო ინტერესების დაცვის თვალსაზრისით, ვიდრე აქამდე იყო. სამოქალაქო სექტორი ამ თემას განიხილავს პოლიტიკურ კონტექსტში და მისთვის ეს პოლიტიკური ინტერესების მატარებელია, წაკითხულიც კი არ ჰქონდათ პროექტი და ისე აპროტესტებდნენ! „ნაციონალურ მოძრაობას“ კი სურს, რომ საზოგადოებაში შექმნას იმის შთაბეჭდილება, რომ ყველას გვისმენდნენ და ახლაც გვისმენენ. ისინი ცდილობენ საზოგადოება დააჯერონ, რომ თუ წინა ხელისუფლება ცუდი იყო, ესენიც ცუდები არიან! და მეტიც, ოპოზიციას, რომელსაც აქვს პოლიტიკური წარუმატებლობა, უნდა, რომ ეს წარუმატებლობები ახსნან არა იმით, რომ მათ ვერ ივარგეს, არამედ ეს ყველაფერი დააბრალონ ხელისუფლებას, განსაკუთრებით უშიშროები სამსახურებს, რომ აი, გვისმენენ და ამის გამო ვერ გავიმარჯვეთ არჩევნებში”, – განაცხადა ირაკლი სესიაშვილმა.
წყარო: „ახალი თაობა“