ეს ის მოსამართლეა, რომელმაც თავის დროზე, მათ შორის, ახალაიას საქმეზე გამამართლებელი განაჩენები გამოიტანა, – ამის შესახებ ადამიანის უფლებათა დაცვის კომიტეტის თავმჯდომარემ, ეკა ბესელიამ გადაცემა 2030-ში სტუმრობისას განაცხადა.
“ელდარ ქობალიას საქმე თავისი შინაარსითა და ფატალური შედეგით ერთ-ერთი უმძიმესი საქმე იყო, რადგან იმ საშინელმა, ძალადობრივმა სისტემამ ადამიანის სიცოცხლე იმსხვერპლა. საერთაშორისო სტანდარტით მიიჩნევა, რომ ასეთ დანაშაულზე ლიბერალური მიდგომა არ დაიშვება და მკაცრი მიდგომა უნდა იყოს”, – განაცხადა ბესელიამ.
მისი თქმით, მიუხედავად იმისა, რომ პროკურატურამ გაგა მკურნალიძისთვის წინასწარი პატიმრობის შეფარდება მოითხოვა, სასამართლომ წინასწარი პატიმრობა არ გამოიყენა.
“ჩემი ინფორმაციით, ეს გადაწყვეტილება მოსამართლე დარახველიძემ მიიღო. ყოველგვარი განსჯის გარეშე ვიტყვი, რომ ეს ის მოსამართლეა, რომელმაც თავის დროზე, მათ შორის, ახალაიას საქმეზე გამამართლებელი განაჩენები გამოიტანა. თუ არ ვცდები, ეს ის მოსამართლეა, რომელსაც გამოკვეთილი პოლიტიკური გადაწყვეტილებები ჰქონდა მაშინ, როცა წინასაარჩევნო პერიოდში დარღვევებს ვასაჩივრებდით. არ ვიცი, ეს შემთხვევით მოხდა თუ არა, მაგრამ შემდეგ, ის თბილისის საქალაქო სასამართლოში გადაიყვანეს და რამდენიმე გახმაურებული საქმე ამ მოსამართლესთან მოხვდა”, – განაცხადა ეკა ბესელიამ.