17:00 საათის მდგომარეობით, ყველა საარჩევნო უბანზე ამომრჩეველთა აქტივობამ 38,16% შეადგინა, – ამის შესახებ ცესკო-ს სპიკერმა ანა მიქელაძემ განაცხადა. ცენტრალური საარჩევნო კომისიის ინფორმაციით, ქვეყნის მასშტაბით საკუთარი არჩევანი 1 337 284 ამომრჩეველმა გააკეთა. მათივე ცნობით, ყველაზე მაღალი აქტივობა კვლავ ამბროლაურის ოლქში 53,6% დაფიქსირდა, ხოლო ყველაზე დაბალი – მარნეულში 28,7%.
„17:00 საათის მდგომარეობით ყველა საარჩევნო უბანზე ამომრჩეველთა აქტივობამ შეადგინა 38,16%, რაც რაოდენობრივად 1 337 284 ამომრჩეველია. ყველაზე მაღალი აქტივობა დაფიქსირდა ამბროლაურის ოლქში 53,6% ხოლო ყველაზე მცირე – მარნეულში 28,7%. რაც შეეხება დედაქალაქს, თბილისში აქტივობამ 36,2% შეადგინა. ეს მონაცემი რომ შევადაროთ 2013 წლის პრეზიდენტის არჩევნების დროს დაფიქსირებულ მონაცემს, 17:00 საათის მდგომარეობით მაშინ აქტივობამ შეადგინა 39,1%.
აღსანიშნავია, რომ საზღვარგარეთ 39 ქვეყანაში გაიხსნა ყველა, 55 საარჩევნო უბანი და მიმდინარეობს კენჭისყრის პროცესი.
დღეს კენჭისყრის დასრულებისთანავე, 20:00 საათზე დაიწყება ავღანეთის ორი საარჩევნო უბნის ბიულეტენების დათვლა. ავღანეთის ორივე საარჩევნო უბნის შემაჯამებელი ოქმი დაუყოვნებლივ აიტვირთება ცესკოს ვებ-გვერდზე.
ასევე, ვეხმაურებით საკონსულო რეგისტრაციების ცალკეულ ფაქტებზე გავრცელებულ ინფორმაციას და აღვნიშნავთ, რომ ცესკომ საზღვარგარეთ ამომრჩეველთა სიები შეადგინა როგორც საკონსულოებისაგან, ისე სახელმწიფო სერვისების სააგენტოს მიერ მოწოდებული მონაცემების საფუძველზე. შესაბამისად, საკონსულო რეგისტრაციებთან დაკავშირებული კითხვები სცდება ცესკოს კომპეტენციას,“- განაცხადა ანა მიქელაძემ.