ის მოსაზრება, რომ თუ საპრეზიდენტო არჩევნებში ვაშაძემ გაიმარჯვა, დავიღუპებით და სამოქალაქო ომი მოხდება, არეულობა იქნება, უსაგნო და უსაფუძვლო მგონია, – ამის შესახებ უფლებადამცველმა, არასამთავრობო ორგანიზაცია “ადამიანის უფლებათა პრიორიტეტის” აღმასრულებელმა დირექტორმა, ლია მუხაშავრიამ მედიაჰოლდინგ „კვირას“ პრესკლუბში გამართულ პრესკონფერენციაზე განაცხადა.
მისი თქმით, საპრეზიდენტო არჩევნების პირველი ტურის შედეგი და კანდიდატების პროცენტული მაჩვენებელი რეალობას მეტ-ნაკლებად ასახავს.
„მივიღეთ დემოკრატიული პროცესი. მთავარი შედეგი ამ შემთხვევაში არის მეორე ტური. ოღონდ ახლა ვართ იმ მდგომარეობაში, საითაც გავიქეცი, იქით წავიქეცი რომ ჰქვია. მართლა ბევრი ადამიანია გაურკვევლობაში, არ უნდა რომ ზურაბიშვილს მისცეს ხმა, მაგრამ არც ვაშაძეს უნდა დაუჭიროს მხარი. ის მოსაზრება, რომ თუ გავიდა ვაშაძე დავიღუპებით და სამოქალაქო ომი მოხდება, არეულობა იქნება, მე უსაგნო და უსაფუძვლო მგონია. ვფიქრობ, საზოგადოებაში ასეთი განწყობა ნამდვილად არ არის. ამ ქვეყანაში საზოგადოებას ყველაზე მეტი დაკვეთა და მოთხოვნა პოლიტიკოსებისგან აქვს სტაბილურობაზე. სტაბილურობის ფასი კარგად ვიცით, ამიტომ ასე იოლად არ წამოეგებიან ვიღაცების შეშფოთებაზე.
იმ ვითარებაში რა უფლებამოსილებაც დარჩა დღეს პრეზიდენტს, მისი გავლენები არ არის იმდენად მნიშვნელოვანი, რომ საკანონმდებლო ორგანოში საკონსტიტუციო უმრავლესობას მოერიოს, შეიქმნას ის მდგომარეობა, როცა ორჯერ პარლამენტი ვერ აკომპლექტებს მთვარობას, არ იღებს მთავრობის პროგრამას და ამის გამო პრეზიდენტს წარმოეშობა უფლება, დაითხოვოს პარლამენტი, დანიშნოს ვადამდელი საპარლამენტო არჩევნები. სხვა საკითხია, თუ ვიღაცას ეშინია გადატრიალების, სამხედრო- პოლიტიკური ოპერაციის, თუ ასეთი ინფორმაცია აქვთ, ესეც საზოგადოებისთვის საშიში არაა. ნუ რა ვქნათ, თავად შექმნეს ეს ვითარება, როცა სამკვდრო-სასიცოცხლოდ გადაიკიდეს ვიღაცები. მე არ მგონია, რომ სადმე დენთის სუნი ტრიალებდეს“, – განაცხადა მუხაშავრიამ.
მისი თქმით, საქართველოს მესამე პრეზიდენტი მიხეილ სააკაშვილი საქართველოში დაბრუნებას ვერ გაბედავს.
„მე შეწყალების კომისიის წევრი ვარ და ჩემი მრწამსით ვფიქრობ, რომ ერთადერთი სიკეთე, რასაც სახელმწიფო აკეთებს, ესაა შეწყალების აქტი, დანარჩენი ყველაფერი ბოროტება და ძალადობაა. ეს ჩემი ფილოსოფიაა, როგორც იურისტის. მე არ ვფიქრობ, რომ სააკაშვილი, რომელსაც არანარი თანამდებობა არ აქვს, მერაბიშვილი, რომელსაც შერყეული აქვს ჯანმრთელობა, ახალაია, რომელიც ამდენი წელია უკვე ციხეშია ადამიანურად არიან უნარიანები ვინმესთვის საფრთხეს წარმოადგენდნენ. თუ ვაშაძე გახდა პრეზიდენტი, თუ შეიწყალა ეს ადამიანები, მე არ ვფიქრობ, რომ ეს ადამიანები თავად გახდებიან საზოგადოებისთვის საშიში, პირიქით, ვფიქრობ, მათი უპირველესი ამოცანა იქნება საკუთარი უსაფრთხოების უზრუნველყოფა, შერყეულ ჯანმრთელობაზე ზრუნვა. არ ვფიქრობ, რომ ესეც არის ბუა და ამით შეიძლება ვინმემ შეგვაშინოს.
გარდა ამისა, სააკაშვილს ძალიან კარგად ვიცნობ, პირადად გავიცანი, ჯერ კიდევ, ამერიკაში სწავლის დროს, როცა იქ ერთად ვსწავლობდით, პიროვნულად, მე დარწმუნებული ვარ, ის ვერ გაბედავს ჩამოსვლას, არ არის უნარიანი ჩამოვიდეს ამ ქვეყანაში. ის არ არის ნაპოლეონი, რომელსაც შუძლია თავის ჯარისკაცებს უთხრას, თქვენ მე ფიცი მომეცით და იმ ფიცის ერთგულები დარჩითო და ესენიც შებრუნდნენ და გაყვნენ მას. არ ვფიქრობ, რომ ასეთი საფრთხე რეალურია. ვისაც ეშინია დალიოს შესაბამისი მედიკამენტები და დამშვიდდეს.
სააკაშვილი ვერ გაბედავს ჩამოსვლას იმიტომ, რომ არ ექნება დასაყრდენი, მისი პოლიტიკური მომხრეებიდან ბევრი უკვე მისგან წასულია, მას ის მხარდაჭერა არ ექნება, არ ექნება რესურსი. არ ექნება შესაძლებლობა ვიღაცას რაღაცა დაავალოს და მან ეს გააკეთოს. მიშა არ არის ნაპოლეონ ბონაპარტე, რომელმაც შეძლო ის, რაც ვიცით რომ გააკეთა. მიშა ამას ვერ გაიმეორებს. მით უფრო, რომ ის ადამიანურად არ არის მამაცი ადამიანი, ჩვენ ეს ვიცით, მას პირადად ბევრი მტერი ჰყავს და ალბათ, საკუთარ უსაფრთხოებაზე უნდა იზრუნოს. მით უფრო, სახელმწიფო მის დაცვას, დარწმუნებული ვარ, არ უზრუნველყოფს, ამაში ფულს არ გადაიხდის“, – განაცხადა ლია მუხაშავრიამ.
შეგახსენებთ, საპრეზიდენტო არჩვენების წინასწარი შედეგებით, “ქართული ოცნების“ მიერ მხარდაჭერილმა პრეზიდენტობის კანდიდატმა, სალომე ზურაბიშვილმა ამომრჩეველთა ხმების 38,64% , ხოლო “ნაციონალური მოძრაობის“ კანდიდატმა, გრიგოლ ვაშაძემ – 37,74 % მიიღო.
თამუნა შეყილაძე
„კვირა“