ვატო შაქარიშვილი – სოციალურად დაუცველი ბავშვებისთვის დახმარების გაზრდა მამუკა ბახტაძის სამთავრობო პროგრამის ნაწილია

„სოციალურად დაუცველი ბავშვებისთვის დახმარების გაზრდა პრემიერ-მინისტრის, მამუკა ბახტაძის სამთავრობო პროგრამის ნაწილია, რომელიც მან საქართველოს პარლამენტში წარადგინა და რომელსაც პარლამენტმა ნდობა გამოუცხადა, შესაბამისად, ზედმეტია და სპეკულაციაა იმაზე საუბარი, რომ ეს არის წინასაარჩევნოდ გადადგმული ნაბიჯი“, – ასე პასუხობს საკრებულოს წევრი ვახტანგ შაქარიშვილი გაერთიანებული ოპოზიციის ერთ-ერთ ლიდერს, გიორგი ვაშაძეს.
მისი თქმით, ცვლილებები გათვალისწინებული 2019 წლის ბიუჯეტის პროექტში იქნება და ამას საზოგადოება ძალიან მალე იხილავს.
„ეს იყო მამუკა ბახტაძის სამთავრობო პროგრამის ნაწილი, „ქართული ოცნების“ ხელისუფლება არც ერთ ნაბიჯს არ დგამს საარჩევნო ხმების მოპოვების მიზნით. მარტივი გასაგებია, ვინ ატყუებს საზოგადოებას და ვინ ცდილობს მის შეცდომაში შეყვანას. გადახედონ საკუთარ წინასაარჩევნო კამპანიას, პოპულისტური ნარატივი ეს არის „ნაციონალური მოძრაობის“ სტილი, ხოლო “ქართული ოცნება” მოქმედებს მოქმედებდა და გადადგამს ყველა ნაბიჯს, რათა ჩვენი მოსახლეობის ყველა პრობლემას ადეკვატური პასუხი გაეცეს და ჩვენი მოქალაქეების ყოველდღიურობა საგრძნობლად გაუმჯობესდეს“, – განაცხადა ვახტანგ შაქარიშვილმა.