„საპრეზიდენტო არჩევნების პირველი ტურის შედეგებიდან ჩვენ რამდენიმე გაკვეთილი გამოვიტანეთ და ერთ-ერთი მნიშვნელოვანი გაკვეთილი იყო, რომ მოსახლეობასთან ნებისმიერი ფორმით კომუნიკაციის ნაკლებობაა“, – ამის შესახებ პარლამენტის ჯანდაცვის კომიტეტის ხელმძღვანელმა აკაკი ზოიძემ განაცხადა.
„ჩვენს მიერ გაკეთებული ბევრი რამის შესახებ ინფორმაცია არ არის მისული მოქალაქეებამდე. ასევე, ბევრი რამ იგეგმება ქვეყანაში არსებული ტენდენციების გასაძლიერებლად და უარყოფითი ტენდენციების აღმოსაფხვრელად. მოქალაქეებს ამის თაობაზეც პრაქტიკულად არ გააჩნიათ ინფორმაცია. მხოლოდ პიარით ეს არ კეთდება, ეს უნდა მოხდეს ადამიანებთან შეხვედრითაც, სხვადასხვა საკომუნიკაციო ფორმებით“, – განაცხადა ზოიძემ.
მისი თქმით, მმართველი გუნდი ეცდება, რომ კომუნიკაციის სხვადასხვა საშუალებით მიიტანოს ინფორმაცია მოსახლეობამდე.
„ვეცდებით, რომ კომუნიკაციის ყველანაირი საშუალებით, მათ შორის პირისპირ თუ ჯგუფური შეხვედრებით მიზნობრივ ჯგუფებთან, პროფესიულ წრეებთან, ყველასთან, ვისთანაც შესაძლებელია ხმის მიწვდენა, ვისაც აწუხებს ამ ქვეყნის ბედ-იღბალი, მათთან ერთად შევძლოთ ამის გაკეთება. ასევე, მოვძებნოთ კომუნიკაციის ახალი, ინოვაციური ფორმები, რომ მივიტანოთ ეს ინფორმაცია მოსახლეობამდე და მივიღოთ უკუკავშირი, რათა მოსმენილი პრობლემების გადაწყვეტა და პოლიტიკის გადაწყობა მოვახერხოთ ისე, როგორც მოქალაქეებისთვის იქნება მისაღები. ჩვენი მიზანია, საზოგადოებამ დაინახოს, რომ ეს არის მთავრობა, რომელიც მათ უსმენს და შესაბამისად იქცევა“, – განაცხადა ზოიძემ.