დღეიდან მმართველი პარტია მოსახლეობასთან აქტიურ შეხვედრებს იწყებს. საპრეზიდენტო არჩევნების მეორე ტურისთვის „ქართულ ოცნებას“ სრული მობილიზაცია აქვს გამოცხადებული.
შესაბამისი გზავნილებით ამომრჩეველს შტაბების წევრები შეხვდებიან და როგორც პარტიაში ითქვა, დაიწყება ზრუნვა მათი პრობლემების, რაც შეიძლება, სწრაფად მოგვარებაზე. საორგანიზაციო საკითხებზე გუშინაც იმსჯელეს „ქართული ოცნების“ ოფისში, სადაც შეხვედრას უმრავლესობის წევრები, პარტიის თავმჯდომარე და პრეზიდენტობის დამოუკიდებელი კანდიდატი ესწრებოდნენ.
საქართველოში საპრეზიდენტო არჩევნები 28 ოქტომბერს გაიმართა.
ცესკოს მონაცემების თანახმად, „ქართული ოცნების“ მიერ მხარდაჭერილმა დამოუკიდებელმა კანდიდატმა სალომე ზურაბიშვილმა ხმების – 38.64% მიიღო, „ნაციონალური მოძრაობის“ კანდიდატმა გრიგოლ ვაშაძემ – 37,74%.
საპრეზიდენტო არჩევნების მეორე ტური საბოლოო შედეგების გამოცხადებიდან ორი კვირის ვადაში ჩატარდება. სავარაუდო თარიღად კი 2 დეკემბერი სახელდება.