„ქრონიკის“ ჟურნალისტს კიევში უთხრეს, რომ რუსთაველის გამზირზე ნაციონალური მოძრაობის მიერ გამართულ აქციაზე სააკაშვილის და რადას დეპუტატის სემენჩენკოს მიერ ჩამოყვანილ ექვსეულს შესაძლოა გაესროლა კიდეც. თბილისში სპეცოპერაციის დროს დაკავებული მებრძოლებისა და მიხეილ სააკაშვილის შესაძლო კავშირის შესახებ „იმედის კვირამ“ სიუჟეტი მოამზადა.
აქციის დღეს თბილისში საეჭვო მიზნით ჩამოსული უკრაინის მოქალაქეები დააკავეს. მალევე მათი ინტერესების დამცველად მოგვევლინა დეპუტატი სემენჩენკოც, რომელიც, როგორც გაირკვა, ექსპრეზიდენტს ვარშავაშიც შეხვდა და მასთან ერთად დესტაბილიზაციის ერთგვარ გეგმასაც განიხილავდა. ახლა საქართველოსგან კონკრეტულ მტკიცებულებებს და მებრძოლების კანონის შესაბამისად დასჯას უკრაინის ხელისუფლებაც ელოდება.
2 დეკემბერს თბილისში ბატალიონ „დონბასის“ წევრები დააკავეს. მათ ბრალი საქართველოს სისხლის სამართლის კოდექსის 236-ე მუხლის მესამე და მეექვსე ნაწილებით წარუდგინეს, რაც ჯგუფურად ცეცხლსასროლი იარაღის, საბრძოლო მასალის, ფეთქებადი მოწყობილობის მართლსაწინააღმდეგო შეძენა-შენახვას გულისხმობს. მათ სასამართლომ პატიმრობა 4 დეკემბერს შეუფარდა.