უკრაინის ავტოკეფალიის საკითხზე დასმულ შეკითხვას საქართველოს პრეზიდენტმა სალომე ზურაბიშვილმა უპასუხა.
მისი თქმით, ეს ძალიან სენსიტიური საკითხია. პრეზიდენტის თქმით, ის საუბრობს, არა როგორც კერძო პირი, არამედ, როგორც საქართველოს პრეზიდენტი.
„დღეს, მე როგორც კერძო პირი არ გესაუბრებით, მე ვარ საქართველოს პრეზიდენტი და ამდენად, მაქვს ძალიან დიდი პასუხისმგებლობა. ვფიქრობ, რომ საქართველოს ეკლესიამ, საპატრიარქომ ჩემზე ნაკლებად არ იცის და არ ანიჭებს მნიშვნელობას საქართველოს ეკლესიის ავტოკეფალიას, ჩემზე ნაკლებად არ იცის, რა მოჰყვა მას და რამდენად მნიშვნელოვანია. თუ საქართველოს ეკლესია და საპატრიარქო ფრთხილობენ რაღაცებს, რაღაც შედეგების გამო, რომელზედაც არ მინდა ახლა ხაზგასმა, მაგრამ ყველას გვესმის რას ეხება, არ შეიძლება, რომ როგორც საქართველოს პრეზიდენტი ვიყო ნაკლებად პასუხისმგებელი.
მე გითხარით უკვე, რომ ჩემთვის ადვილი იქნებოდა მილოცვა, მაგრამ არ მივულოცე, რადგან არ ვთვლი, რომ მაქვს უფლება, ავიღო პასუხისმგებლობა ამ საკითხების მიმართ, არ მინდა, რომ დავაკონკრეტო გარკვეული მიზეზები, მაგრამ ყველამ ვიცით, რა საფრთხეები შეიძლება, იყოს. ეს ყველაზე კარგად იცის საქართველოს საპატრიარქომ. მე არ ავიღებ ჩემს თავზე იმის პასუხისმგებლობას, რომ გავამძაფრო არსებული სიტუაცია“, – განაცხადა სალომე ზურაბიშვილმა.