კახა კალაძე – ჩვენი მიზანია მეტროსადგურში მატარებლის ლოდინის დრო 2.5 წუთამდე შემცირდეს

მეტროს ორივე ხაზს ორი ახალი შემადგენლობა დაემატა, – ამის შესახებ დედაქალაქის მერმა, კახა კალაძემ დედაქალაქის მთავრობის სხდომაზე განაცხადა.
როგორც დედაქალაქის მერმა აღნიშნა, გასულ წელთან შედარებით, მეტროს მგზავრთა რაოდენობა 25%-ითაა გაზრდილი. შესაბამისად, აუცილებელია, სერვისი იყოს გაუმჯობესებული.
“ჩვენი მიზანია, განვახორციელოთ მეტროს იმ არსებული ვაგონების რეაბილიტაცია, რომელსაც ამის რესურსი აქვს. მეტროს ორივე ხაზს ორი ახალი შემადგენლობა დაემატა. ასევე, უახლოეს მომავალში კიდევ ორი ახალი შემადგენლობა დაემატება, რაც მნიშვნელოვანია იმ თვალსაზრისით, რომ მეტროსადგურებში მოცდის დრო შევამციროთ. გასულ წელთან შედარებით, მეტროს მგზავრთა რაოდენობა 25%-ითაა გაზრდილი. შესაბამისად, აუცილებელია, სერვისი იყოს გაუმჯობესებული, ვაგონები – კომფორტული, მოცდის დრო კი 2.5 წუთამდე შემცირდეს. მოცდის დრო თავიდან ოთხი წუთი იყო, დღეს ეს მაჩვენებელი სამ წუთზეა დაყვანილი. ვსაუბრობ პიკის საათებზე, როდესაც ყველაზე მეტი ადამიანი გადაადგილდება. ჩვენი მიზანია, ეს დრო 2.5 წუთამდე დავიყვანოთ“, – განაცხადა კახა კალაძემ.