დარგობრივი ეკონომიკისა და ეკონომიკური პოლიტიკის კომიტეტის თავმჯდომარე, რომან კაკულია მამუკა ხაზარაძესა და ბადრი ჯაფარიძეს ბოდიშს უხდის, კომიტეტის დღევანდელ სხდომას კი სამარცხვინოდ აფასებს. ამის შესახებ რომან კაკულიამ “პალიტრანიუსის” ეთერში განაცხადა. ინფორმაციას სააგენტო “ინტერპრესნიუსი” ავრცელებს.
რომან კაკულიას თქმით, კომიტეტზე ეროვნული ბანკის პრეზიდენტის მოსმენა რომ შემდგარიყო, ხვალ შესაძლოა “თიბისი ბანკს” ზიანი მისდგომოდა, რის გამოც კაკულიამ საკუთარ თავზე პასუხისმგებლობა ვერ აიღო.
რომან კაკულიას თქმით, მისი კომიტეტის სხდომა სამარცხვინო იყო და ასეთი სხდომებით ქვეყანა ვერ აშენდება.
“ახლა ერთმანეთს ვინ ვაჯობებთ, არავის აღარ აინტერესებს უკვე. ჩვენ ვაჯობებთ ნაციონალებს, ნაციონალები გვაჯობებენ ჩვენ, „პატრიოტები“ როგორ იძიებენ ვიღაცაზე შურს თუ როგორ იქნება – ეს ხალხს აღარ აინტერესებს. საზოგადოებას უნდა მშვიდობაზე ორიენტირებული, გამაერთიანებელი ძალა, რომელიც ლიბერალსაც და კონსერვატორსაც ერთად დასვამს და ერთმანეთთან დიალოგს ასწავლის.
წასული პოლიტიკაა ასეთი საუბრები, რასაც ჩვენ ვხედავთ. ჩემი კომიტეტის სხდომა, ჩემი აზრით, სამარცხვინო იყო დღეს, ჩემთვისაც და ყველასთვისაც, იმ გაგებით, რომ ქვეყანა ასეთი სხდომებით ვერ აშენდება. კი ბატონო, ვიღაცამ თავისთვის მეტი ქულა ჩაიწერა, ვიღაცამ ნაკლები, მაგრამ ქვეყანას რა აქედან?!“, – განაცხადა რომან კაკულიამ.