რა მიზნით დაბრუნდა ყოფილი პრემიერმინისტრი ირაკლი ღარიბაშვილი პოლიტიკაში და რამდენად რეალურია ვერსია მის მიერ ირაკლი კობახიძის ჩანაცვლებასთან დაკავშირებით.
კითხვას დღეს პარლამენტის თავმჯდომარემ შემდეგნაირად უპასუხა. “პირდაპირ გეტყვით, პარლამენტში რაიმე არსებითი ცვლილებები არ იგეგმება. წარმოშობილია ოთხი ვაკანსია და ეს ოთხი ვაკანსია შეივსება”.
რაც შეეხება ღარიბაშვილის გადაწყვეტილების შეფასებას, ირაკლი კობახიძე ამბობს, რომ ყოფილ პრემიერს მნიშვნელოვან ეტაპზე როგორც ქვეყნის, ასევე პარტიის გაძლიერებაში მნიშვნელოვანი წვლილი აქვს შეტანილი და ამჯერადაც მიზანი იგივეა. “ჯერ კიდევ შარშან პარტიის თავმჯდომარე საუბრობდა, რომ პარტიის გასაძლიერებლად საჭიროა ქმედითი ნაბიჯების გადადგმა. ღარიბაშვილის დაბრუნება სწორედ ამით არის განპირობებული”- განაცხადა ირაკლი კობახიძემ.
ყოფილი პრემიერის პოლიტიკაში დაბრუნებისთანავე გაჩნდა მოსაზრება, რომ შესაძლოა მან კენჭი იყაროს შუალედურ არჩევნებში, მთაწმინდის მაჟორიტარის მანდატით შევიდეს პარლამენტში და კობახიძე ჩაანაცვლოს. ანალიტიკოსების ნაწილი ამ მოსაზრებას კობახიძის მიმართ გუნდის შიგნით არსებული უკმაყოფილებით ხსნიდა. ეს კითხვა ღარიბაშვილის ინტერვიუს დროსაც დაისვა. მან კობახიძის ჩანაცვლება გამორიცხა და თქვა, რომ მიზანი პარტიის 2020 წლის არჩევნებისთვის მაქსიმალური გაძლიერებაა. პოლიტიკაში მეორედ მოსვლის შემდეგ უნდა ველოდოთ თუ არა ოცნების გამარჯვების შემთხვევაში პრემიერის პოსტზე მეორედ მოსვლას – ღარიბაშვილმა კითხვაზე კონკრეტული პასუხისგან თავი შეიკავა.