NDI-ს კვლევაში ჩანს, რომ დღეს მეტი მოქალაქე თვლის, რომ ვითარება გაუმჯობესდა, მთელი რიგი მიმართულებებით, – ამის შესახებ შს მინისტრის მოადგილემ არჩილ თალაკვაძემ ტელეკომპანია „იმედის“ გადაცემა „პოლიტიკაში“ საუბრისას განაცხადა.
როგორც თალაკვაძემ აღნიშნა, NDI-ს კვლევები გარკვეულ ნაწილში „ქართული ოცნების“ შიდა კვლევებს ემთხვევა.
„ჩვენთვის საზოგადოებრივი აზრის ნებისმიერი კვლევა არის ძალიან საინტერესო, ამ კვლევასაც გავეცანით ყურადღებით. ამ კვლევაში ჩანს, რომ დღეს მეტი მოქალაქე თვლის, რომ ვითარება გაუმჯობესდა, მთელი რიგი მიმართულებებით და ეს ხდება ჯერ კიდევ იმ პერიოდში, როდესაც „ქართულ ოცნებას“ ჯერ კიდევ არ ყავს წარდგენილი თავისი განახლებული გუნდი და არ აქვს წარმოდგენილი პროგრამა. ჩვენ ჯერ კიდევ წინ გვაქვს ჩვენი პროგრამის პრეზენტაცია, წინ გვაქვს ასეულობით შეხვედრა მოქალაქეებთან სოფლებსა და ქალაქებში, ასევე წინ გვაქვს იმ ადამიანების წარდგენა თავის კუთხეებში და თავის ქალაქებში, რომლებიც დარწმუნებული ვარ, წარმატებით გაართმევენ თავს ამ არჩევნებს“, – განაცხადა არჩილ თალაკვაძემ.
რაც შეეხება იმ ადამიანებს, რომლებსაც ჯერ გადაწყვეტილი არ აქვთ ვის დაუჭერენ მხარს არჩევნებში, შს მინისტრის მოადგილე ამბობს, რომ ადამიანები გაცილებით გულწრფელად პასუხობენ ირიბ შეკითხვებს, ვიდრე პირდაპირ შეკითხვებს.
„გარკვეულ ნაწილში ეს კვლევები ემთხვევა კიდეც იმ მონაცემებს, რომელიც ჩვენს ხელთ არის და ჩვენი შიდა კვლევებითაც ჩანს. მაგალითად ის, რომ „ნაციონალურ მოძრაობას“ 14%-ზე მეტი რეიტინგი არ აქვს, ეს ჩვენი კვლევებითაც ასეა. ასევე, პოზიტიური ტენდენციები ჩანს ამ კვლევაში, როდესაც მოსახლეობას ეკითხებოდნენ, თუ რომელი პარტია გაიმარჯვებს არჩევნებში, გამოკითხულთა” 1/3-ზე თვლის, რომ არჩევნებში გაიმარჯვებს „ქართული ოცნება“. ეს მონაცემი რომ შეადარო 2015 წლის აგვისტოს მონაცემებს, 20%-იანი მატება გვაქვს ზუსტად ამ პარამეტრით, რაც ნიშნავს, რომ ჩვენი მოსახლეობის 20%-ით მეტი თვლის, რომ არჩევნებში გაიმარჯვებს „ნაციონალური მოძრაობის“ ალტერნატივა და ეს არის „ქართული ოცნება“ – ყველაზე ძლიერი გუნდი, რომელსაც აქვს პრეტენზია, რომ ის შეძლებს საქმის გაკეთებას.
არის შეკითხვები, სადაც პირდაპირ ეკითხებიან მოსახლეობას, თუ ვის მისცემდნენ ხმას და 19% პირდაპირ ამბობს, რომ მისცემს ხმას „ქართულ ოცნებას“, მაგრამ მინდა გითხრათ, რომ ფსიქოლოგიური კვლევები ცნობილია და ადამიანები გაცილებით გულწრფელად პასუხობენ ირიბ შეკითხვებს, ვიდრე პირდაპირ შეკითხვებს“, – განაცხადა არჩილ თალაკვაძემ.